Том Круз Парис-2024-ыг хааж, Олимпын далбааг Лос-Анжелест шилжүүлэн өглөө

Холливудын кино од Том Круз Францын үндэсний цэнгэлдэх хүрээлэнгийн дээвэр дээрээс бууж, Олимпын далбааг гардан авч, зуны наадмын дараагийн зохион байгуулагч Лос-Анжелест хүлээлгэн өгснөөр Парис-2024 өндөрлөлөө.

Круз Холливуд тэмдэгний ойролцоо шүхрээр буусны дараа Олимпын далбааг АНУ-ын тамирчдад дамжуулж, тамирчид далбааг Лос-Анжелесын нарлаг далайн эрэгт хүргэсэн байна.

Далайн эрэг дээр “Red Hot Chili Peppers”, “Billie Eilish”, “Snoop Dogg”, “Dr. Dre” зэрэг уран бүтээлчид Олимпын далбааг угтан авсныг тэмдэглэж уран бүтээлээ толилуулжээ.

Парис хотноо хоёр долоо хоног үргэлжилсэн спортын наадмын турш Хятад, АНУ-ын шигшээ багууд медалийн хүснэгтийн тэргүүн байрын төлөө сүүлчийн тоглолт хүртэл өрсөлдсөн бөгөөд эцсийн мөчид Америкийн эмэгтэй сагсан бөмбөгийн баг Францын багийг нэг онооны зөрүүгээр хожсоноор 40 дэх алтан медалиа авч, медалийн тавцанд тэргүүлэв.

Цар тахлаас хойших анхны зуны Олимпын наадам хатуу дүрэм журам, хязгаарлалтгүй болж өндөрлөсөн ч Украины дайн, Ойрх Дорнод дахь мөргөлдөөний улмаас аюулгүй байдлын өндөржүүлсэн бэлэн байдлын дор зохион байгуулагдлаа.

Энэ удаагийн Олимпын наадамд шинээр брейкинг төрөл нэмэгдсэн бол тамирчид 3х3 сагсан бөмбөг, спорт авиралт, скейтборд, серфингийн төрлөөр хоёр дахь удаагаа өрсөлдсөн.

Наадмын хугацаанд томоохон дуулиан дэгдээгүй ч Олон Улсын Олимпын Хороо зарим маргаантай асуудлуудтай тулгарлаа.

Усанд сэлэлтийн тэмцээний үеэр Хятадын тамирчидтай холбоотой допингийн маргаан дэгдэж, тус төрөлд сүүлийн хэдэн арван жил тэргүүлж ирсэн АНУ хүндхэн сорилттой тулгарсан.

Эмэгтэйчүүдийн боксын тэмцээн жендерийн шалгуурыг тойрсон шуурганд өртсөнөөр ОУОХ болон Олон улсын боксын холбоо хоёрын хоорондын зөрчилдөөнийг ил болгосон юм.

Түүнчлэн Парисын төвөөр дамжин урсдаг Сена мөрнийг 1.5 тэрбум доллароор цэвэрлэсэн нь үр дүнгээ өгч триатлон, усанд сэлэлтийн марафоны тамирчид өвчлөлд өртөөгүй байна.

Эх сурвалж: Reuters