Сонгуулийн дүнг эсэргүүцсэн жагсаал Венесуэлд хоёр дахь өдрөө үргэлжиллээ

Мягмар гарагт Венесуэлийн ерөнхийлөгчийн сонгуулийн үр дүнг эсэргүүцсэн жагсаал нийслэл Каракас хотод хоёр дахь өдрөө үргэлжиллээ.

Ерөнхийлөгч Николас Мадурогийн ялалтыг эсэргүүцэж байгаагаа харуулахаар хотын төвд олон мянган хүн цугларчээ.

Олонх нь шинэ засгийн газар байгуулагдах хүртэл зогсохгүй гэж байгаа бол зарим нь аюулгүйн хүчнийхнийг сөрөг хүчний жагсагчидтай нэгдсэн тохиолдолд үр дүнд хүрнэ гэж үзэж байна.

Гэсэн хэдий ч цэрэг, цагдаагийн байгууллага одоог хүртэл Мадурод үнэнч хэвээр байгаа бөгөөд жагсагчдын эсрэг нулимс асгаруулагч хий, резинэн сум ашигласан байна.

Орон нутгийн албаныхны мэдээлснээр 750 орчим хүн баривчлагдсан бол тус улсын тэргүүлэх төрийн бус байгууллагуудын мэдээлснээр хэд хэдэн хүн амиа алдаж, олон арван хүн шархаджээ.

Мягмар гарагт Венесуэлийн Батлан ​​хамгаалахын сайд генерал Владимир Падрино эсэргүүцлийн жагсаалыг “төрийн эргэлт” гэж тодорхойлоод, цэргийнхэн Мадурод “туйлын үнэнч байж, болзолгүй дэмжиж” байгааг мэдэгдсэн байна. 

Мадурогийн намын гишүүн бөгөөд түүний хуулийн зөвлөхөөр ажиллаж байсан Үндэсний сонгуулийн зөвлөлийн дарга Ерөнхийлөгчийн гурав дахь ялалтыг зарласан ч одоог хүртэл санал хураалтын нарийвчилсан тооллогыг ил болгоогүй байна.

Сонгуулийн үр дүнг эсэргүүцэж, өөрийн нэр дэвшигчээ 70%-ийн саналаар ялалт байгуулсан гэж үзэж буй сөрөг хүчний удирдагч Мария Корина Мачадо мягмар гарагт тайван жагсахыг жагсагчдад уриалжээ.

“Бид тайван байх ёстой. Бид төрөөс зохион байгуулж буй өдөөн хатгалгад автаж болохгүй. Тэд Венесуэлчүүдийг хагаралдуулахыг хүсэж байна” гэж хэлсэн байна. 

Энэ үеэр, Мадурогийн холбоотон Ерөнхий прокурор Тарек Сааб баривчлагдсан хүмүүсийг “хүчний байгууллагын шаардлагыг эсэргүүцсэн, хамгийн ноцтой тохиолдолд терроризмын” хэргээр яллахаа мэдэгдэв.

Харин “Ард түмний хүсэл” нам санал хураалтын дүнг ил болгохыг шаардаж буй идэвхтнүүдийг төр засгийн зүгээс хэлмэгдүүлэх ажлыг эрчимжүүлж байгааг анхааруулжээ.

Хотын өөр нэг хэсэгт мөн Ерөнхийлөгч Мадурогийн бүлгүүд түүнийг дэмжиж байгаагаа харуулахаар цугларсан байна.

НҮБ-ын хүний ​​эрхийн Дээд комиссар Волкер Түрк Венесуэлийн бүх ард түмний тайван замаар жагсаал цуглаан хийх эрхийг хүндэтгэхийг эрх баригчдад уриалжээ.

 Эх сурвалж: BBC