“Inside Out 2” нээлтийн амралтын өдрүүдээр $295 саяын орлого олж, “Box Office”-ын амжилтыг эвджээ

“Pixar”-ын “Inside Out 2” кино өнгөрсөн амралтын өдрүүдэд дэлхий даяар 295 сая ам.долларын орлого олж, “Box Office”-ын амжилтыг эвджээ.

Энэ нь бүх цаг үеийн хамгийн их орлого олсон хүүхэлдэйн киноны нээлт болсныг “Pixar”-ын толгой компани болох “Disney” мэдэгдэв.

Зөвхөн Хойд Америкт тасалбарын борлуулалт ойролцоогоор 155 сая ам.долларт хүрч, нээлтийн амралтын өдрүүдээр хамгийн их орлого олсон үзүүлэлтээрээ “Dune: Part 2” киног гүйцэж түрүүлжээ.

Мөн “Inside Out 2”-ын нээлтийн орлого киноны өмнөх ангиас хамаагүй өндөр байна. 2015 онд “Inside Out” нээлтийн амралтын өдрүүдээрээ 90 сая долларын орлого олж байсан бол дэлхий даяар нийт 858 сая долларын орлого олж байжээ.

Энэ нь мөн тус компанийн Хойд Америкийн зах зээл дэх нээлтүүдээс ашиг орлогоороо 2018 онд гарсан “The Incredibles 2”-ын ард хоёрдугаарт бичигджээ.

“Inside Out 2” бол 2015 оны Оскарын шагналт хүүхэлдэйн киноны үргэлжлэл бөгөөд Райли хэмээх охины сэтгэл хөдлөлийг голчлон харуулдаг.

Эхний анги нь баяр баясгалан, айдас, уур хилэн зэрэг мэдрэмжийн тухай байсан бол энэ анги нь атаархал, түгшүүр зэрэг асуудлуудыг хөндсөн байна.

Жил бүр тасалбарын борлуулалтын ихэнх хэсэг ихэвчлэн тавдугаар сарын эхний амралтын өдрөөс есдүгээр сарын эхэн хүртэлх хугацаанд хийгддэг.

Гэсэн хэдий ч өнгөрсөн жил болсон жүжигчид, кино зохиолчдын ажил хаялтаас болоод энэ жил цөөн кино нээлтээ хийж байгаа ба кино компаниудын хувьд зуны улирал удаашралтай эхэлсэн юм.

Хэвлэл мэдээллийн зах зээлийн судалгааны “Comscore”-ын мэдээлснээр энэ жил Хойд Америк даяар зарагдсан тасалбарын тоо 2023 оны мөн үетэй харьцуулахад бараг дөрөвний нэгээр бага байгаа аж.

Тэгвэл “Inside Out 2”-ын нээлт ашиг орлого тааруу байсан кино театруудын хувьд таатай үр дүн авчирч байна.

Эх сурвалж: BBC