2023 онд дэлхийн цахилгаан эрчим хүчний нийлүүлэлтийн 30 хувийг сэргээгдэх эрчим хүч эзэлжээ

Салхи, нарны эрчим хүчний үйлдвэрлэл эрчимтэй өссөнөөр өнгөрсөн жил анх удаа дэлхийн нийт цахилгаан эрчим хүчний 30 гаруй хувийг сэргээгдэх эрчим хүч эзэлсэн байна.

Хэдийгээр цахилгаан эрчим хүчний нийт эрэлт өссөөр байгаа ч хурмал түлшний хэрэглээ буурч эхлэх цаг ойртож байгааг дэлхийн эрчим хүчний системийн тухай тайланд тэмдэглэжээ.

Цэвэр эрчим хүч нь сүүлийн 10 жилийн хугацаанд хурмал түлшний өсөлтийг бараг гуравны хоёроор удаашруулахад аль хэдийн тусалсан гэж “Ember” цаг уурын судалгааны хүрээлэнгийн тайланд өгүүлсэн байна. 2000 онд сэргээгдэх эрчим хүч нь дэлхийн цахилгаан эрчим хүчний 19%-ийг эзэлж байсан бол өнгөрсөн онд 30 гаруй хувь болж өсжээ. 

Үүнд нарны эрчим хүчний өсөлт голчлон нөлөөлсөн байна. “Ember”-ийн тайланд дурдсанаар нарны эрчим хүч нь 2023 онд нүүрснээс хоёр дахин их цахилгаан эрчим хүч шинээр үйлдвэрлэжээ.

Ингэснээр 19 дэх жилдээ хамгийн хурдацтай хөгжиж буй цахилгаан эрчим хүчний эх үүсвэр болсон байна.

Дэлхийн цахилгаан эрчим хүчний анхны дэлгэрэнгүй тоймд дэлхийн цахилгаан эрчим хүчний хэрэгцээний 92 хувийг бүрдүүлдэг 80 улс, мөн 215 орны түүхэн мэдээллийг ашиглажээ. Эдгээр мэдээлэлд үндэслэн “Ember” цэвэр цахилгаан эрчим хүчний өсөлт нь ирэх онд дэлхийн хурмал түлшний үйлдвэрлэлийг 2 хувиар бууруулна гэж тооцоолсон байна.

 “Ember”-ийн судалгааны хэлтсийг хариуцдаг Дэйв Жонс “Эрчим хүчний салбараас ялгардаг утаа буурах нь гарцаагүй. Гэхдээ хорт хийн ялгаралт хэр хурдан буурах нь сэргээгдэх эрчим хүчний хувьсгал хэр хурдан үргэлжлэхээс хамаарна” гэв.

Хэдийгээр цахилгаан эрчим хүчний салбар дахь хурмал түлшний хэрэглээ буурч байгаа ч тээвэр, хүнд үйлдвэрлэл, дулааны салбарт асар их үүрэг гүйцэтгэсэн хэвээр байна.  

Өнгөрсөн онд Эрчим хүчний хүрээлэнгийн хийсэн тусдаа судалгаагаар газрын тос, хий, нүүрс зэрэг хурмал түлш нь дэлхийн анхдагч эрчим хүчний 82 хувийг бүрдүүлж байгааг тогтоожээ.

Эх сурвалж: The Guardian