ӨРХИЙН ЭМНЭЛЭГ: Хэт ачааллаас шалтгаалж халдвартай өвчтөнүүдтэйгээ өдөр бүр холбогдож, хяналт тавьж чадахгүй байгаа

2021-07-23

Улсын хэмжээнд 549 өрхийн эмнэлэг байдгаас 134 нь нийслэлд үйл ажиллагаа явуулж, нийт эмч ажилтнуудын 22.3 хувь нь (113 мянга) анхан шатны эрүүл мэндийн байгууллагад ажиллаж байна.

Коронавирусийн нөхцөл байдал хүнд байгаа энэ цагт ӨЭМТ-ийн ачаалал эрс нэмэгдэж, халдвартай иргэдийг хяналтандаа бүрэн авч чадахгүй байгаа нь нууц биш. Учир нь нийслэлийн хэмжээд өдөрт 500-1000 шинэ халвар бүртгэгдэж, эрүүл мэндийн салбар хүний нөөцийн хомсдолд ороод буйг ЭМЯ-наас мэдээлсэн.

Өрхийн эмнэлгийн ачаалал хэр байгаа, халдвартай иргэддээ хүрч чадаж байгаа эсэхийг тодруулахад,

Баянзүрх дүүргийн 15 дугаар хороо “Цэдэн-Эрдэнэ” өрхийн эрүүл мэндийн төвийн их эмч Ө.Хандармаа:

-Иргэдийн дунд халдвар нэмэгдхийн хэрээр өрхийн эмнэлгийн ачаалал эрс нэмэгдсэн. Манай өрхийн эмнэлгийн хувьд нийт арван хүн ажилладаг ч таван нь халдвар аваад эмчлүүлж байгаа. Бид үндсэн тусламж үйлчилгээгээ үзүүлэхээс гадна Covid-19 туссан болон ойрын хавьтлын иргэдэд тусламж үйлчилгээ үзүүлдэг.

Иргэдэд өгөх эм тарианы хувьд Covid-19 туссан хүмүүст улсаас 70 мянган төгрөгний багц өгч байгаа. Үүнд вирусийн эсрэг эм, витамин C, D, халуун бууруулах эм, хордлого тайлах эм мөн эмчийн үзлэг, хувцас хэрэглэл багтдаг.

Баянзүрх дүүргийн 25 дугаар хороо “Энх-Агшин” өрхийн эрүүл мэндийн төвийн их эмч Т.Цэцэгжаргал:

-Манай 25 дугаар хороонд жилдээ 700 гаруй жирэмсэн эх хяналтанд ордог. Covid-19 халдвараар энэ оны зургаан сараас хойш өнөөдрийг хүртэл 45-50 жирэмсэн эх халдвар авч, эмчлүүлж байна. Үүнээс 80 хувь нь эмнэлэгт хэвтэн эмчлүүлсэн. Ачаалал энгийн үеэс эрс нэмэгдэж, халдвартай өвчтөнүүдтэйгээ өдөр бүр холбогдож, хяналт тавьж чадахгүй л байна.

Баянзүрх дүүргийн гуравдугаар хороо “Эмнэхүй” өрхийн эрүүл мэндийн төвийн нийгмийн ажилтан Э.Сувд-Эрдэнэ:

-Манай өрхийн эмнэлэг дөрвөн эмч, дөрвөн сувилагчтай. Үүнээс Covid-19-ийн шинжилгээнд хоёр эмч явдаг бөгөөд үзлэг, вакцинд бусад эмч нар ажиллаж байна. Хажуугаар бид үндсэн тусламж үйлчилгээгээ үзүүлэхээр ачаалал эрс нэмэгдсэн.