Израилын ерөнхий сайд дайны дараах Газын зурвасын төлөвлөгөөг танилцууллаа

Пүрэв гарагт Израилын Ерөнхий сайд Биньямин Нетаньяху тус улсын Аюулгүй байдлын танхимын гишүүдэд дайны дараах Газын зурвасын төлөвлөгөөг танилцуулжээ.

Тэрээр палестинчуудын тусгаар тогтносон улс байгуулахыг хүсэж буй Баруун эрэг, Газын зурвас зэрэг Йорданаас баруун зүгт орших бүх газар нутгийг Израилын аюулгүй байдлын хяналтад байлгах, Газын зурвасыг цэрэггүйжүүлэх, радикал үзэлгүй болгох, урт хугацаандаа Палестиныг хүлээн зөвшөөрөхөөс татгалзах санал гаргасан байна. 

Нетаньяху анклавын өмнөд хэсэгт байрлах Газа-Египетийн хилийн хяналтыг Израилд шилжүүлж, хил дамнасан хууль бус наймаанаас урьдчилан сэргийлэхийн тулд тус бүс нутагт Египет, АНУ-тай хамтран ажиллахыг санал болгов.

Мөн Газа дахь Хамасын засаглалыг “террорист улс орон, бүлэглэлтэй холбоогүй, тэднээс санхүүгийн дэмжлэг авдаггүй” орон нутгийн албан тушаалтнуудад шилжүүлэх тухай баримт бичигт дурджээ. 

Тэрээр НҮБ-ын Палестины дүрвэгсдийн асуудал эрхэлсэн “UNRWA” агентлагийг татан буулгаж, оронд нь олон улсын тусламжийн бусад бүлгүүдийг байгуулахыг уриалсан байна.

“Ерөнхий сайд зарчмын баримт бичигтээ дайны гол зорилго болон Газа дахь Хамасын засаглалыг иргэний засаглалаар солих олон нийтийн санаа бодлыг тусгасан” гэж Ерөнхий сайдын ажлын албанаас мэдэгдэв. 

Хариуд нь Палестины Ерөнхийлөгч Махмуд Аббасын хэвлэлийн төлөөлөгч Набил Абу Рудейне Нетаньяхугийн санал болон Газын газарзүйн болон хүн ам зүйн бодит байдлыг өөрчлөх Израилын оролдлого бүтэлгүйтэх нь гарцаагүй гэж мэдэгдсэн байна.

“Хэрэв дэлхий нийт бүс нутагт аюулгүй байдал, тогтвортой байдал бий болгохыг жинхэнээсээ хүсэж байгаа бол Палестины газар нутаг дахь Израилын эзлэн түрэмгийллийг зогсоож, Иерусалим гэх нийслэлтэй тусгаар тогтносон Палестин улсыг хүлээн зөвшөөрөх хэрэгтэй” гэж хэлэв.

Эх сурвалж: Reuters