Оросын сансрын нисгэгч сансарт 878 хоногоос дээш хугацаагаар байж, дээд амжилт эвдлээ

Оросын сансрын нисгэгч Олег Кононенко нь сансарт өнгөрүүлсэн нийт хугацаагаараа тойрог замд 878 хоногоос дээш хугацаагаар байсан Геннадий Падалкаг гүйцэж түрүүлэн, дэлхийн дээд амжилтыг эвдсэнийг Оросын сансрын корпорац ням гарагт мэдэгдэв.

Кононенко нь ням гарагт дээд амжилтыг эвдсэн бөгөөд зургадугаар сарын 5-нд сансарт өнгөрүүлсэн нийт хоног нь 1,000-д хүрч, есдүгээр сарын сүүлээр 1,110-д хүрэх төлөвтэй байгааг гэж Роскосмос мэдэгджээ.

Кононенко дэлхийгээс 423 километрийн зайд тойрог замд эргэлдэж буй Олон улсын сансрын станцаас (ОУСС) “Тасс” агентлагт өгсөн ярилцлагадаа “Би өөрийн дуртай зүйлээ хийх гэж сансарт нисдэг болохоос дээд амжилт тогтоох гэж биш” гэж хэлсэн байна.

“Би өөрийн амжилтаараа бахархаж байна. Гэхдээ уг дээд амжилтыг Оросын сансрын нисгэгч эзэмшиж байгаад илүү их бахархаж байна.” 

Роскосмосын мэдэгдэлд өгүүлснээр 59 настай тэрбээр нийт 878 хоног, 11 цаг, 29 минут, 48 секундийн амжилт үзүүлсэн Падалкагийн амжилтыг эвдсэн байна. 

Кононенко нь хүүхэд байхдаа сансарт нисэхийг мөрөөддөг байсан ба инженерийн дээд сургуульд элсэн суралцсаныхаа дараа сансрын нисгэгчийн сургалтад хамрагдаж байжээ. Тэрээр анх 2008 онд сансарт ниссэн байна.

Тэрээр сүүлийн даалгавраа өнгөрсөн жил эхлүүлсэн бөгөөд “Союз МС-24” хөлгөөр ОУСС-д иржээ. 

ОУСС бол АНУ, Оросын одоог хүртэл нягт хамтран ажилладаг олон улсын цөөн хэдэн төслийн нэг юм. Арванхоёрдугаар сард Роскосмос НАСА-тай ОУСС-д хийх хөндлөн нислэгийн хөтөлбөрийг 2025 он хүртэл сунгаснаа зарласан.

ЗХУ 1957 онд дэлхийн тойрог замд анх удаа “Спутник 1” хиймэл дагуулыг хөөргөж, улмаар 1961 онд Зөвлөлтийн сансрын нисгэгч Юрий Гагарин сансарт ниссэн анхны хүн болж, сансрын уралдааны эхний жилүүдэд барууныхныг түгшээж байсан.

Гэвч 1991 онд ЗХУ задран унаснаас хойш Оросын сансрын хөтөлбөр асар их санхүүжилтийн хомсдол, авлигатай тулгараад байгаа.

Ерөнхийлөгч Владимир Путиний удирдлага дор албан тушаалтнууд Оросын сансрын хөтөлбөрийг уналтаас аврахаа удаа дараа амласан ч ноцтой асуудал байсаар байна гэж албаны хүмүүс болон сансрын шинжээчид үзэж байна. 

Эх сурвалж: Reuters