Хойд Солонгос шумбагч онгоцноос далавчит пуужин харвах туршилт хийжээ

Ням гарагт Хойд Солонгос зүүн эргийн ус руу шумбагч онгоцноос “Пулхвасал-3-31” нэртэй далавчит пуужин харвах туршилт хийжээ. Туршилтыг Ким Жон Ун удирдан явуулсан байна.

Хойд Солонгос тус пуужингаа өнгөрсөн лхагва гарагт мөн туршсан бөгөөд энэ талаар Өмнөд Солонгосын “Yonhap” агентлаг мэдээлж байв.

Ням гарагийн 08:00 цагт болсон туршилтын дараа Өмнөд Солонгосын штабын дарга нарын нэгдсэн хороо (JCS) “Манай арми Хойд Солонгосын өдөөн хатгасан нэмэлт шинж тэмдгүүдийг ажиглахын тулд АНУ-тай нягт уялдаатай ажиллаж байна” гэж мэдэгдэв.

Умардын төрийн мэдээллийн “KCNA” агентлаг болон албан ёсны “Rodong Sinmun” сонины мэдээлснээр пуужингууд тус улсын зүүн эргээс 7,421 секунд болон 7,445 секундийн турш далайн дээгүүр нисэж, тодорхойгүй арлын байг оносон бөгөөд энэ нь нислэгийн хугацаа хоёр цагийг давсан болохыг илтгэж байгаа аж.

Ким туршилтыг амжилттай болсон гээд, “Тэнгисийн цэргийн хүчирхэг хүчин байгуулах зорилгод стратегийн ач холбогдолтой” гэж тодорхойлсон байна.

Сүүлийн саруудад цөмийн зэвсэгтэй коммунист улс нь удаа дараа пуужин туршсан нь бүс нутгийн хурцадмал байдлыг улам нэмэгдүүлээд байна.

Хойд Солонгосын удирдагч Ким бодлогын чиглэлээ өөрчилж, улам түрэмгий мэдэгдлүүд хийж, энхийг сахиулах эсвэл цэргийн ажиллагааг нэмэгдүүлэх зорилготой хэд хэдэн хэлэлцээрийг зогсоосон.

Пхеньян нэгдүгээр сараас хойш хатуу түлшээр ажилладаг шинэ төрлийн пуужин болон цөмийн зэвсэг тээвэрлэх чадвартай усан доорх довтолгооны нисгэгчгүй онгоц туршсанаа мэдэгдээд байгаа.

Тус улс нь НҮБ-ын хориг арга хэмжээг зөрчиж, хоёр жилийн турш сар бүр пуужин хөөргөж, зэвсгийн хөгжүүлэлтээ өргөжүүлсээр байгаа юм.

Энэ сарын эхээр Ким Өмнөд Солонгостой дахин нэгдэх зорилгоо цуцалж буйгаа зарлаж, Өмнөдийг “үндсэн дайсан” хэмээн тодорхойлсон.

Энэ мэдэгдэл нь Хойд Солонгос дайнд бэлтгэж байж болзошгүй гэсэн болгоомжлолыг нэмэгдүүлэхэд хүргээд байна.

Эх сурвалж: BBC, Reuters