Сэм Алтманыг халсантай холбогдуулан “OpenAI”-ийн 735 ажилтан ажлаасаа халагдана гэж сүрдүүлж, удирдах зөвлөлийг огцрохыг шаарджээ

Гүйцэтгэх захирал Сэм Алтманыг гэнэт огцруулж, Алтманыг “Microsoft” компанид ажилд авсны дараа “OpenAI”-ийн 770 ажилтнаас 730 гаруй нь компанийн удирдах зөвлөлийг огцрохыг уриалж, эс бөгөөс ажлаасаа гарахаа мэдэгдсэн байна.

Ажилчид захидалдаа захирлуудын зөвлөлийн чадамжид эргэлзэж байгаагаа илэрхийлж, энэ нь пүүсийн ажилд сөргөөр нөлөөлж байна гэж буруутгажээ. 

“Та бүхний гаргасан шийдвэрүүд та бүхнийг ‘OpenAI’-г хянах чадваргүй гэдгийг харууллаа. Бид өөрсдийн эрхэм зорилго болон ажилчдаа үл хайхардаг, зөв шийдвэр гаргах чадамжгүй, чадваргүй хүмүүсийн төлөө эсвэл тийм хүмүүстэй хамтран ажиллахгүй” гэж захидалд өгүүлсэн байна.

Хэрэв удирдах зөвлөл огцорч, Алтман болон баасан гарагт чөлөөлөгдсөн “OpenAI”-ийн ерөнхийлөгч асан Грег Брокман нарыг эргүүлэн томилохгүй бол бүх ажилчид Алтманыг дагаж “Microsoft” руу явах болно гэж анхааруулав.

Гарын үсэг зурсан хүмүүсийн дунд удирдах зөвлөлөөс Алтманыг түр орлохоор сонгогдсон Мира Мурати, мөн “OpenAI”-ийн хамтран үүсгэн байгуулагч, эрдэмтэн, ТУЗ-ийн гишүүн Илья Суцкевер нар багтжээ.

Суцкевер нь Алтманыг огцруулахад чухал үүрэг гүйцэтгэсэн боловч дараа нь буруу зүйл хийснээ ойлгож, “X”-ээр дамжуулан Алтманаас уучлалт гуйсан. Болж буй үйл явдлын улмаас Муратигийн албан тушаалын томилгоог хүчингүй болгож, “Twitch”-ийн үүсгэн байгуулагч 40 настай Эмметт Шийрийг түр орлон гүйцэтгэгчээр томилсон байна.

“OpenAI”-ийн ТУЗ-д Суцкеверээс гадна “Quora” компанийн гүйцэтгэх захирал Адам Д’Анжело, технологийн бизнес эрхлэгч Таша Макколи, Жоржтауны их сургуулийн Аюулгүй байдал, хөгжиж буй технологийн төвийн стратеги болон суурь судалгааны тэтгэлэг хариуцсан захирал Хелен Тонер нар байдаг.

Ажилчид мөн захидалдаа “Microsoft” компани “OpenAI’-ийн бүх ажилчдад ажлын байр бий гэдгийг баталгаажуулсан” болохыг дурджээ.

Эх сурвалж: CNN