Орос улс дахин нэг “Авангард” пуужингийн системийг Оренбург дахь харвах төхөөрөмжид холболоо

Оросын зэвсэгт хүчин цөмийн хүчин чадалтай “Авангард” пуужингийн системийг Оросын өмнөд хэсэгт байрлах пуужин харвах төхөөрөмжид холбосныг Батлан хамгаалах яамны телевиз пүрэв гарагт мэдээлэв.

Ерөнхийлөгч Владимир Путин анх 2018 онд “Авангард” хэт авиан пуужингийн системийг танилцуулж байсан ба үүнийг АНУ-ын шинэ үеийн зэвсэг болон пуужингийн довтолгооноос хамгаалах системийг нэвтлэх чадвартай дэвшилтэт технологи гэж магтаж байв.

“Авангард” пуужингийн систем зорилтот байдаа ойртох үед цэнэгт хошуу нь пуужингаас салж, дууны хурднаас 27 дахин их буюу цагт 34,000 км-ийн хурдаар пуужингийн траекторын гадна огцом маневр хийх чадвартай.

Оросын Батлан хамгаалах яамны мэдэлд байдаг “Звезда” телевизийн суваг баллистик пуужинг Казахстаны ойролцоох Оренбург муж дахь харвах төхөөрөмж рүү зөөж, аажмаар босоо байрлалд шилжүүлж, дараа нь баганад бэхэлж буй бичлэгийг хуваалцсан байна.

Орос улс анхны “Авангард” системээ 2019 онд тус байгууламжид суурилуулж байв.

Орос, АНУ хоёулаа хүйтэн дайны үеийн зэвсгийн уралдааныг удаашруулах, цөмийн дайны эрсдэлийг бууруулах зорилготой зэвсгийн хяналтын гэрээнүүд нуран унаж байгаад харамсаж байгаагаа илэрхийлсэн.

Гэсэн ч АНУ, Орос, Хятад улс олон төрлийн шинэ зэвсгийн систем, тэр дундаа хэт авиан системийг тус тусдаа хөгжүүлсээр байна.

АНУ Хятадыг хамгийн том өрсөлдөгч, Оросыг хамгийн том заналхийлэл гэж үздэг бөгөөд тус улсын Ерөнхийлөгч Жо Байден энэ зууныг ардчилсан болон автократ улсуудын хоорондох оршин тогтнолын төлөөх өрсөлдөөнөөр тодорхойлогдоно гэж үзэж байна.

Эх сурвалж: Reuters