newswire

Д.Одбаярыг Цэцийн гишүүнээс эргүүлэн татуулна

Монгол Улсын Үндсэн хуулийн Жаран тавдугаар зүйлийн 4 дэх хэсэгт “Үндсэн хуулийн цэцийн дарга, гишүүн хууль зөрчвөл Үндсэн хуулийн цэцийн шийдвэр, анх илгээсэн байгууллагын саналыг үндэслэн Улсын Их Хурал эгүүлэн татаж болно” гэж, Монгол Улсын Үндсэн хуулийн цэцийн тухай хуулийн 5 дугаар зүйлийн 3 дахь хэсэгт “Цэцийн гишүүн гэмт хэрэг үйлдсэнийг шүүх тогтоосон бол түүнийг …анх илгээсэн байгууллагын саналыг үндэслэн Улсын Их Хурал эгүүлэн татаж болно” гэж тус тус заасан.

Доржийн Одбаяр нь Үндсэн хуулийн цэцийн гишүүн, даргаар ажиллаж байх хугацаандаа 2019 оны 11 дүгээр сард Бүгд Найрамдах Солонгос Улсын “Korean air” компанийн онгоцоор тухайн улсад зорчихдоо үйлчлэгч бүсгүйн өгзөгт хүрч, бэлгийн дарамт үзүүлсэн хэрэгт холбогдож, тус улсад саатуулагдан, хуулийн байгууллагаар нь  шалгагдаж, хэрэг үйлдсэн гэм буруугаа хүлээн зөвшөөрч, 7 сая орчим вонноор торгуулж, шийтгэгдсэний эцэст эх орондоо ирсэн.  

Иргэд, сонгогчдын зүгээс гадаад улсад зорчих үедээ ёс зүйгүй гэмт үйлдэл, хэрэг өдүүлж Монгол Улсын болон нийт монголчууд, төрийн албан хаагчдын нэр хүндийг гутаасан Үндсэн хуулийн цэцийн гишүүн Д.Одбаярыг цэцийн даргын албан тушаалаас чөлөөлөөд өнгөрсөнд нэн шүүмжлэлтэй хандаж, Цэцийн гишүүний албан тушаалаас нь мөн нэн даруй чөлөөлөх ёстой гэж үзэж, шаардаж байна.

Үндсэн хуулийн цэцийн гишүүн Монгол Улсын нэр хүндийг олон улсад унагасан гэмт үйлдэлдээ өнөөг хүртэл хариуцлага хүлээхгүй төрийн эрх баригч улс төрийн хүчний дэмжлэгээр албан тушаалдаа үлдэж, үүгээрээ улс төрийн барьцаанд орж, хараат бусаар ажиллах ямар ч чадамжгүй гэдгээ нотлон, Үндсэн хуулийн цэцийн үйл ажиллагааг гацаасан, нэр хүндийг нь унагасан, хуулийн зөрчилтэй, Үндсэн хуулийн цэцийн гишүүний ёс зүйд огт нийцэхгүй асуудлыг дахин үүсгэлээ.

Үндсэн хуулийн цэцийн гишүүн Д.Одбаярын ийм ёс зүйгүй байдал нь Үндсэн хуулийн цэцэд итгэх иргэд, олон нийтийн итгэлийг үгүй болгож байгааг Улсын Их Хурлын түвшинд зайлшгүй хэлэлцэх шаардлагатай гэж үзэж байна.

Монгол Улсын Үндсэн хуулийн Хорин гуравдугаар зүйлийн 1 дэх хэсэгт “Улсын Их Хурлын гишүүн бол ард түмний элч мөн бөгөөд нийт иргэн, улсын ашиг сонирхлыг эрхэмлэн баримтална.” гэж заасан тул дээр дурдсан хууль зүйн болон бусад үндэслэл шаардлагын хүрээнд Үндсэн хуулийн цэцийн гишүүнийг эгүүлэн татах тухай тогтоолын төслийг боловсрууллаа.

          Тогтоолын төсөлд Монгол Улсын Үндсэн хуулийн цэцийн гишүүн Доржийн Одбаярыг Монгол Улсын Үндсэн хуулийн Жаран тавдугаар зүйлийн 4 дэх хэсэг болон Монгол Улсын Үндсэн хуулийн цэцийн тухай хуулийн 5 дугаар зүйлийн 3 дахь хэсэгт заасан үндэслэл, журмын дагуу эгүүлэх татахаар тусгасан бөгөөд тогтоолын төсөл батлагдсанаар Монгол Улсын язгуур ашиг сонирхлыг хамгаалж хараат бусаар ажиллах учиртай, гагцхүү Үндсэн хуульд захирагдан ажиллах шаардлагатай Үндсэн хуулийн цэцийн нэр хүнд сэргэж, үйл ажиллагаанд нь итгэх иргэд, олон нийтийн итгэл нэмэгдэн, Үндсэн хуульт ёс улам бэхжинэ.  

Тогтоолын төсөл нь Монгол Улсын Үндсэн хууль, нэгдэн орсон олон улсын гэрээ, конвенц, холбогдох бусад хуультай нийцсэн болно.

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet