Монгол Улсад 15-49 насны хоёр эрэгтэй тутмын нэг нь илүүдэл жинтэй эсвэл таргалалттай байна

Амьдралын буруу хэвшлээс үүдэлтэй зүрх судас, хавдар, чихрийн шижин зэрэг халдварт бус өвчнүүдийг нөхцөлдүүлэгч гол хүчин зүйлийн нэг нь сүүлийн жилүүдэд маш хурдацтай нэмэгдсээр байгаа илүүдэл жин, таргалалтын асуудал юм.

Дэлхийн эрүүл мэндийн байгууллага нь илүүдэл жин ба таргалалт гэдгийг хэвийн биш өөхний хуримтлал буюу биед илүүдэл өөх хэт хуримтлагдсанаас эрүүл мэндийн байдлыг алдагдуулдаг хэмээн тодорхойлжээ. Хүн амын дунд таргалалт ба илүүдэл жинг тогтооход өргөн хэрэглэдэг Биеийн жингийн индекс (БЖИ) гэдэг нь биеийн жинг өндөртэй харьцуулсан үзүүлэлт бөгөөд БЖИ-ийг биеийн жинг биеийн өндрийн квадратад хувааж олдог (кг/м2). Эрэгтэйчүүдийн биеийн нийт жингийн 10-20 хувь, эмэгтэйчүүдийн биеийн нийт жингийн 25-30 хувийг өөх эзэлж байвал эрүүл хэвийн жинтэй гэж үздэг.

Монгол Улсад 15-49 насны хоёр эрэгтэй тутмын нэг нь илүүдэл жинтэй эсвэл таргалалттай байна.

Эрчүүдийн дунд илүүдэл жин ба таргалалтын тархалт насны бүлгээр:

• 15-19 нас: 17,7 хувь
• 20-29 нас: 33,2 хувь
• 30-39 нас: 59,2 хувь
• 40-49 нас: 63,9 хувь байгаа юм.

Илүүдэл жин таргалалтын шалтгаан:

• Эрүүл бус буюу түргэн хоол, хүнсний хэрэглээ нэмэгдсэн
• Гэр орон болон ажлын байранд суугаа хэв маяг давамгайлж, хөдөлгөөний хомсдолд орсон

Таргалалтаас үүсэх хүндрэлүүд:

• Цусны даралт ихсэлт
• Чихрийн шижин II хэв шинж
• Тархины харвалт
• Хавдар
• Элэгний өөхлөлт
• Үе мөчний өвчлөл зэрэг хүндэрлүүд үүснэ.