Фүкүшимагийн цөмийн гамшгаас хойш 11 жилийн дараа Футаба хотын оршин суугчид гэртээ харих боломжтой боллоо

Цөмийн гамшгаас хойш 10 гаруй жилийн дараа нүүлгэн шилжүүлэх тушаалыг цуцалснаар Фукушима Дайчи цөмийн цахилгаан станц байрладаг хотын оршин суугчид гэртээ харих боломжтой болжээ.

Футаба хот нь нүүлгэн шилжүүлэх захирамжийг цуцалсан 11 газрын сүүлчийнх нь болсон байна.

2011 оны гуравдугаар сарын 11-нд цахилгаан станцад осол гарсны улмаас ойролцоо амьдардаг 300,000 гаруй хүнийг түр нүүлгэн шилжүүлэх тушаал гаргаж, нэгэн цагт хөл хөдөлгөөн ихтэй байсан хотууд хоосорч үлдсэн юм.

Үүнээс хойших жилүүдэд их хэмжээний цэвэрлэгээ, халдваргүйжүүлэлтийн ажил хийснээр тусгаарлагдсан бүсэд амьдарч байсан зарим оршин суугчид гэртээ харих боломжтой болсон ба хамгийн сүүлд Футаба хот оршин суугчдаа дахин хүлээж авч байна.

Тус хотын нийтийн байгууламжуудыг ирэх даваа гарагт дахин нээхээр төлөвлөжээ.

2020 оны гуравдугаар сард цацрагийн түвшин жилд 20 миллизивертээс хэтрэхгүй гэж шинжээчид мэдэгдсэнээс хойш оршин суугчдыг Футабагийн зүүн хойд хэсэгт нэвтрэхийг зөвшөөрсөн боловч тэнд амьдрах боломжгүй хэвээр байв. Энэ хэмжээ нь бүтэн биеийн хоёр томографын шинжилгээтэй тэнцэх бөгөөд олон улсын аюулгүй байдлын хяналтын байгууллагууд үүнийг хувь хүний ​​нэг жилд цацрагт өртөх дээд хязгаар гэж тодорхойлдог.

Хотын 80 гаруй хувь нь цацраг идэвхт бодисын агууламж өндөр хэвээр байгаа ба бусад хэсгийн халдваргүйжүүлэлт хэзээ дуусах талаар албан ёсны мэдээлэл байхгүй байна.

Цөмийн гамшгаас өмнө Футаба 7,100 орчим хүн амтай байсан бол долдугаар сарын сүүлчээр 5,500 гаруй хүн оршин суугчаар бүртгэлтэй байна гэж хотын захиргаа мэдэгдсэн.

Хотын нүүлгэн шилжүүлэх тушаалыг цуцалсан хэдий ч оршин суугчдын хэд нь буцаж ирэх, хот хэзээ бүрэн сэргэх нь тодорхойгүй байна. Өнгөрсөн наймдугаар сард явуулсан судалгаагаар оршин суугчдын 60.5 хувь нь буцаж ирэхгүй гэж хариулсан бол 11.3 хувь нь буцаж ирэхийг хүсжээ.

Хотын хэвлэлийн төлөөлөгчийн хэлснээр Футаба 2030 он гэхэд хүн амаа 2,000-д хүргэх зорилт тавьсан байна.

2020 онд Квансей Гакуин их сургуулийн хийсэн судалгаанаас үзвэл нүүлгэн шилжүүлсэн хүмүүсийн 65 хувь нь Фукушима руу буцаж нүүхийг хүсээгүй бол 46 хувь нь үлдэгдэл бохирдлоос айж, 45 хувь нь өөр газарт суурьшсан байжээ.

Эх сурвалж: CNN