Барууны орнууд Украинд зэвсгийн тусламжаа нэмэгдүүлж, пуужингийн довтолгооноос хамгаалах хүчийг бэхжүүлэхээ амлалаа

Брюссель дэх НАТО-ийн төв байранд Украины 50 холбоотон цуглаж, Оросын пуужингийн цохилтын дараагаар Киевт агаарын довтолгооноос хамгаалах дэвшилтэт зэвсэг нийлүүлэхээр болсноо зарлалаа.

Их Британи, Канад, Франц, Нидерланд улсууд пуужин, радар зэрэг зэвсэг амласан бол АНУ мөн ижил амлалт өгөөд байна. Германы амласан өндөр технологийн нэг систем аль хэдийнээ Украинд хүргэгджээ.

Их Британи Украины тагнуулын, ложистикийн чадавхыг дэмжих зорилгоор агаарын довтолгооноос хамгаалах пуужин, олон зуун нисгэгчгүй онгоц хандивлахаа мэдэгдэв. Мөн өмнө нь нийлүүлсэн 64-өөс гадна 18 гаубицын их буу нийлүүлэхээр болсон байна.

Лхагва гарагт Брюссельд болсон уулзалтын дараа АНУ-ын Батлан ​​хамгаалахын сайд Ллойд Остин “Үр дүнтэй ажиллахад шаардлагатай бүх зүйлийг нийлүүлэхийн тулд бид чадах бүхнээ хийх болно” гэж мэдэгдсэн байна.

Францын Ерөнхийлөгч Эммануэль Макрон Украинд агаарын довтолгооноос хамгаалах систем нийлүүлэхээ мэдэгдэв. Тэрээр ямар систем илгээх талаар тодорхой хэлээгүй боловч энгийн иргэдийг нисгэгчгүй онгоцны цохилтоос хамгаалахад анхаарна гэж мэдэгджээ.

Нидерланд 15 сая евро буюу 14.5 сая долларын үнэ бүхий агаарын довтолгооноос хамгаалах пуужин нийлүүлнэ гэж мэдэгдсэн бол Канад улс 47 сая канад доллар буюу 34 сая ам.доллар гаруй үнэ бүхий хиймэл дагуулын холбоо, камертай нисгэгчгүй онгоц зэрэг цэргийн тусламж үзүүлэхээ амлав.

Үүний зэрэгцээ, лхагва гарагт Украины арми Германаас нийлүүлсэн орчин үеийн “IRIS-T SLM” агаарын довтолгооноос хамгаалах системийн эхний хэсгийг хүлээн авчээ.

Ерөнхийлөгч Володимир Зеленский Украины тэнгэрийг хамгаалахын тулд барууны холбоотнуудаас агаарын довтолгооноос хамгаалах систем нийлүүлэхийг хэдэн сарын турш хүссэн.

Харин Орос Украины холбоотнуудад Киевт дэвшилтэт зэвсэг нийлүүлэхгүй байхыг удаа дараа анхааруулсан билээ.

Эх сурвалж: BBC