ДЭЛХИЙН МЭДЭЭ

Эквадорын шоронд болсон аллагын улмаас 100 гаруй хүн амиа алджээ

Мягмар гарагт Эквадорын шоронд болсон аллагын улмаас 116 хүн амиа алдаж, 80 орчим хүн шархадсан гэж Эквадорын Ерөнхийлөгч Гильермо Лассо лхагва гарагт мэдэгдэв. Далайн эргийн Гуаякил хотын захад орших Литорал хорих ангид цуст мөргөлдөөн болсон бөгөөд амиа алдагсдын тоо урьдчилан тооцоолсноос илүү байсан байна.

Лхагва гарагт Гильермо Лассо телевизээр хэлсэн үгэндээ шоронг бүрэн хамгаалалтад аваагүй байгааг мэдэгдээд хоригдлуудын хамаатан садан, гэр бүлийнхнийг энэ бүсээс хол байхыг уриалжээ. Мөн ойрын хугацаанд илүү олон цогцос олдох магадлалтай гэв.

Эквадорын шоронгийн агентлаг “SNAI” нь шоронгийн нэг павильонд дэлбэрэлт, гэмт хэргийн бүлэглэлүүдийн хооронд үймээн самуун болсон гэж мэдээлсэн бөгөөд амиа алдсан болон шархадсан хүмүүс бууны сум, гар бөмбөгнөөс болж бэртсэн болохыг бүс нутгийн цагдаагийн командлагч Фаусто Буэненьо хэлэв.

“SNAI”-ийн тоо баримтаас үзвэл Эквадорын шоронгуудад энэ жил 140 гаруй хүн хүчирхийллийн улмаас амиа алдсан байна. Хамгийн сүүлийн хэрэгтэй холбогдуулан засгийн газар Эквадорын шорон даяар 60 хоногийн онц байдал зарлалаа. Энэхүү арга хэмжээний дагуу цэргүүд хорих ангиудад байрлаж, нэгжлэг болон бусад тандалтын арга хэмжээ авах зорилгоор хоригдлуудын хувийн нууц, чөлөөт эвлэлдэн нэгдэх эрхийг хязгаарладаг байна.

Тус муж онцгой байдлын үед шоронгийн системд 24 сая доллар зарцуулахаар болжээ.

Эх сурвалж: CNN

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet