СОЁЛ УРЛАГ

О.Ивээл: Өвлийн олимпод оролцож, эх орныхоо нэрийг дуурсгах нь миний зорилго

Монгол Улсад өвлийн спортын тамирчид өсөн дэвжих нөхцөл бололцоо байсангүй. Тэгвэл өвлийн олимпоос аварга төрүүлэх зорилготой ”Мөсөн өргөө”-ний бүтээн байгуулалт дуусч, өчигдөр нээлтээ хийлээ. Хэдийгээр энэхүү цогцолборыг хувийн хэвшлүүд хамтарч босгосон ч тамирчдад ихээхэн түлхэц болох нь дамжиггүй.

“Мөсөн өргөө”-ний нээлтэд Ерөнхийлөгч У.Хүрэлсүх оролцсон бөгөөд сонирхолтой зочдын нэг нь О.Ивээл байв. Тэрбээр АНУ-ын Денвер хотод амьдардаг бөгөөд Монголдоо түр хугацаанд иржээ.

О.Ивээл дөрвөн наснаас буюу 11 жилийн турш уран гулгалтаар хичээллэж байгаа аж. Тэрээр АНУ-ын Олимпын хороонд бэлтгэл хийдэг бөгөөд өдөр бүр 150 км, хоёр талдаа 300 км зам туулж долоо хоногийн зургаан өдөрт нь бэлтгэлээ хийдэг байна. Түүний хувьд өвлийн олимпод оролцож, Монгол Улсынхаа нэрийг дуурсгах том зорилготой бөгөөд Монголд ирэх үеэр бэлтгэл тасардаг байсан учир “Мөсөн өргөө” ашиглалтад орсонд баяртай байна гэсэн юм.

О.Ивээл “Би 2010 оны өвлийн олимпоос Солонгосын тамирчин Ким Юуна алтан медаль хүртсэн үзүүлбэрийг үзсэн. Тэр үзүүлбэр надад маш их урам зориг өгч үлгэр жишээ болсон учраас бэлтгэлээ өдөр бүр шантралгүй хийж байна. Мөсөн дэвжээн дээр гарах бүртээ маш их урам авдаг. Ирээдүйд өвлийн олимпод оролцож Монголынхоо нэрийг дуурсгах нь миний хамгийн том зорилго.

Монгол дахь “Мөсөн өргөө”-ний мөсний стандарт миний бэлтгэл хийдэг АНУ-ын Олимпын хорооны стандарттай маш адилхан байна. Эх орондоо бэлтгэл хийх боломжоор хангагдаж байгаадаа баяртай байна” гэв.

2021 оны есдүгээр сарын 29. Монголын анхны “Мөсөн өргөө”-ний нээлт боллоо.
ГЭРЭЛ ЗУРГИЙГ Б.БЯМБА-ОЧИР/MPA

Харин О.Ивээлийн ээж н.Оюунтуяа “Америк дахь бэлтгэл хийдэг олимпын ордон манай гэрээс 150 км зайтай. Бид өдөртөө 300 км зам туулдаг. Үүний тулд өдөр бүр 04:30 цагт босно. Миний охин дөрвөн настайгаасаа өглөө бүр эрт сэрэхдээ нэг ч удаа нойрмоглож байгаагүй. Тэрийг нь харахад маш их баяртай байдаг. Охиноо чадах хүртлээ дэмжинэ” гэсэн юм.

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet