Трамп Путинд “уурлаж” байгаагаа хэлээд, гал зогсоох тохиролцоонд хүрэхгүй бол хариу арга хэмжээ авахаа анхааруулав

Доналд Трамп Украинд гал зогсоохоор хэдэн долоо хоног оролдсоныхоо дараа Оросын Ерөнхийлөгч Владимир Путинд  “маш их уурлаж”, “эгдүүцсэн” гэдгээ мэдэгдэв.

АНУ-ын Ерөнхийлөгч “NBC News”-д өгсөн ярилцлагынхаа үеэр Украины Ерөнхийлөгч Володимир Зеленьскийн бүрэн эрхт байдлыг шүүмжилсэнд Путинд уурлаж байгаагаа хэлээд, хэрэв гал зогсоохыг зөвшөөрөхгүй бол Оросын нефтийг худалдан авч буй орнуудад 50 хувийн татвар ногдуулахаар сүрдүүлжээ.

“Хэрэв Орос бид хоёр Украинд цус урсгаж буй явдлыг зогсоох талаар тохиролцоонд хүрч чадахгүй бол, мөн энэ нь Оросын буруу байх юм бол... би Оросоос гарч буй бүх газрын тосонд хоёрдогч татвар ногдуулна” гэж хэлсэн байна.

Өнгөрсөн зургаан долоо хоногийн хугацаанд Трамп Зууван танхимд Зеленьскийг шүүмжилж, Украины Ерөнхийлөгчийг олон зүйл дээр буулт хийхийг шаардаж ирсэн. Оронд нь тэрээр Путинд зусардаж, Оросын ерөнхийлөгчийн шаардлагад үндсэндээ бууж өгөөд байсан юм.

Харин сүүлийн үйл явдал нь Трампын хандлага өөрчлөгдсөнийг харуулж байгаа ба АНУ гал зогсоох хэлэлцээрийн асуудлаар Москваг ноцтойгоор заналхийлсэн анхны тохиолдол болж байна.

Хэдийгээр Трамп нь Зеленьскийн бүрэн эрхт байдлыг шүүмжилсэн Путиний үйлдэлд “маш их уур нь хүрч”, "эгдүүцсэн" тухайгаа хэлсэн ч Ерөнхийлөгч өөрөө Украины удирдагчийг дарангуйлагч хэмээн нэрлэж, ерөнхийлөгчийн сонгууль явуулахыг шаардаж байсан удаатай.

“Миний уур маш ихээр хүрч, эгдүүцсэн гэж хэлж болно... Путин Зеленьскийн бүрэн эрх байдалд халдаж эхэлсэн нь хэлэлцээр зөв чиглэлдээ явахгүй байгааг харуулж байна” гэж Трамп хэлсэн байна.

Цааш нь “Шинэ удирдлага сонгогдвол гал зогсоох тохиролцоо удаан хугацаагаар хойшлогдоно гэсэн үг” гэж тэрээр нэмж хэлжээ.

Хэрэв Орос гал зогсоохоор тохиролцохгүй бол, мөн Трамп үүнийг Путиний буруу гэж үзвэл сарын дараанаас АНУ-д нийлүүлсэн газрын тос болон бусад бүтээгдэхүүнд 25 хувийн татвар ногдуулна гэж анхааруулсан байна.

Түүнчлэн Оросоос газрын тос худалдаж авсаар байгаа орнуудын АНУ-д орж ирж буй бараа бүтээгдэхүүнд 50 хүртэлх хувийн татвар ногдуулахаар сүрдүүлжээ. Хоёрдогч тарифт өртөх хамгийн том худалдан авагчид бол Хятад, Энэтхэг юм.

Ярилцлага цацагдсаны дараа Зеленьский мөн олон нийтийн сүлжээнд “Орос улс энэ дайныг цааш нь сунгах шалтаг хайсаар байна. Путин Крымд тоглосон тоглолтоо дахин хийж байна” гэж бичжээ.

“Энэ нь хүн бүрд аюултай бөгөөд АНУ, Европ болон энх тайвныг эрэлхийлж буй дэлхийн бүх холбоотнууд зохих хариу арга хэмжээ авах ёстой.”

Эх сурвалж: BBC