“1000 гэрэл зураг 1000 уран бүтээл” гэрэл зургийн шилдэг бүтээлийг шалгаруулна

Гэрэл зургийг MPA.mn

Монгол Улсын Засгийн газрын 2022 оны “Соёлын бүтээлч үйлдвэрлэлийн тэргүүлэх чиглэл, арга хэмжээ батлах тухай” 314 дүгээр тогтоол, “Соёлын тухай” хууль, “Соёлын бүтээлч үйлдвэрлэлийг дэмжих тухай” хуулийг тус тус үндэслэн “Соёлын бүтээлч сар-2024” аяны хүрээнд Монголын гэрэл зургийн салбарын үүсэж, хөгжсөний 90 жилийн ойг угтаж “1000 ГЭРЭЛ ЗУРАГ 1000 УРАН БҮТЭЭЛ” гэрэл зургийн шилдэг бүтээлийг шалгаруулах гэж байна. 

Зорилго: Монгол Улсыг олон улсад сурталчлан таниулах гэрэл зургийн сан бүрдүүлэх зорилгоор “1000 ГЭРЭЛ ЗУРАГ 1000 УРАН БҮТЭЭЛ” гэрэл зургийн шилдэг бүтээлийг шалгаруулна.

Сэдэв: Оролцогчид Монгол орныг дэлхийд тодотгосон бахархалтай соёл, түүний дотор эх хэл, ардын зан заншил, мэдлэг ухаан, байгаль орчин зэрэг биет болон биет бус соёлын өвийн гэрэл зураг болон цуврал гэрэл зургаар оролцож болно. Гэрэл зургийн агуулга дараах сэдвийн хүрээнд явагдана.

• Монгол соёл, ёс заншил, ахуй

• Үндэсний фестиваль, уралдаан, наадам

• Соёлын өв

• Спорт

• Байгаль

Хамрах хүрээ: Мэргэжлийн гэрэл зурагчид болон гэрэл зураг сонирхогч бүх хүн оролцох боломжтой. Тав. Зохион байгуулалт: Сэдвийн агуулгад тохирсон гэрэл зургийн бүтээлийг мэргэжлийн зөвлөл хүлээн авч, бүтээлийн эрхийг худалдан авахтай холбоотой үйл ажиллагааг харилцан тохиролцсоны үндсэн дээр зохион байгуулна. Тухайн гэрэл зургуудаар нэгдсэн сан үүсгэж, ашгийн бус зорилгоор Монгол Улсыг олон улсад сурталчлахад чиглэсэн үйл ажиллагаанд ашиглах болно.

Бүтээлд тавигдах шаардлага:

• Сэдэв агуулгад нийцсэн байх

• Зурагчны нэр, зургийн нэр, тайлбарыг товч бөгөөд тодорхой бичсэн байх

• Гэрэл зураг 30 х 40 см DPI 300 хэмжээтэй, RAW файл бол JPG формат руу хөрвүүлсэн байх

• Гэрэл зураг нь эх хувиар байх

• Оролцогч 5 ба түүнээс дээш бүтээлээр оролцох тохиолдолд өөр өөр өнгө аясыг харуулсан байх

• Бүтээл нь архи, тамхи, садар самуун сурталчилсан утга агуулгагүй байх

• Зөвхөн өөрийн авсан гэрэл зураг байх хэрэв зохиогчийн эрхийн асуудал үүссэн тохиолдолд зохион байгуулагч тал хариуцахгүй

• Хувь хүний нэр хүнд, хувийн нууцтай холбоотой хууль зөрчсөн бүтээлийг хүлээн авахгүй

• Хиймэл оюун ухаан, гар утас ашигласан, бүтээлийг хүлээн авахгүй.

Бүтээл хүлээж авах хугацаа: Оролцох бүтээлийг 2024 оны 11 дүгээр сарын 12-25-ныг хүртэл 1000photography2024@gmail.com цахим хаягаар хүлээн авна.

Холбоо барих: Монголын гэрэл зурагчдын нэгдсэн холбоо, Мэдээлэл авах утас: 99091754