“Парис 2024” Паралимпын наадам Парис хотноо эхэллээ

Өчигдөр Парис 2024 Паралимпын наадмын нээлтийн ёслолын ажиллагаа боллоо. Олимпын наадмын нэгэн адил Паралимпын нээлт Францын нийслэлд анх удаа цэнгэлдэх хүрээлэнгийн гадна талбайд болсон байна.

Пара тамирчид Ялалтын хаалганаас эхлэн Элисейн өргөн чөлөө дагуу жагссаны дараа ёслолын гол үйл ажиллагаа хотын төв хэсэгт Эв нэгдлийн талбайд болжээ.

Зохион байгуулагчдын 65,000 хүн нээлтийг үзнэ гэж тооцоолсон бөгөөд үзэгчид төлбөртэй үйл ажиллагаа задгай талбайд болохоос өмнө парадыг үнэ төлбөргүй үзэх боломжтой байжээ.

Спортын наадам 11 хоног үргэлжлэх ба эхний тоглолтууд пүрэв гарагт болно.

Франц улсад анх удаа зохион байгуулагдаж буй зуны Паралимпын наадамд 4,400 орчим тамирчин, спортын 22 төрөлд, нийт 549 алтан медалийн төлөө өрсөлдөх юм.

Нийт хоёр сая тасалбар зарагдсан бөгөөд 500,000 тасалбар одоо худалдаалагдаж байна.

Олимпын наадмын үеэр ашигласан олон газрууд Паралимпын наадамд дахин ашиглагдах болно: хөнгөн атлетикийн тэмцээн Стад де Франс, усанд сэлэлт Ла Дефэнс Аренад, тэргэнцэртэй теннис Ролан Гаррос, пара морин спортын төрөл Шато де Версальд болох болно. Пара-триатлоны тэмцээн Парисын төвд болох бөгөөд усанд сэлэх хэсэг нь Сена мөрний усанд явагдах аж.

Олимпын наадмын адил Украинд үргэлжилж буй дайны улмаас Орос болон холбоотон Беларусь улс тус наадамд оролцохгүй боловч эдгээр үндэстний зарим тамирчид Төвийг сахисан паралимпын тамирчдын (NPA) бүрэлдэхүүнд оролцох юм.

Эритрей, Кирибати, Косово улсууд анх удаа паралимпод оролцох бол найман тамирчин Паралимпын дүрвэгсдийн багаас өрсөлдөх болно.

Эх сурвалж: BBC