БАЙГАЛЬ ОРЧИН

Алжирт ой хээрийн түймэр гарч, 42 хүн амиа алджээ

2021-08-11

Мягмар гарагт Алжирт гарсан ойн түймрийн улмаас 42 хүн амь үрэгдсэний 25 нь түймрийг унтраахаар дайчлагдсан цэргүүд байсан гэж засгийн газраас мэдээлжээ. Цэргүүд өөр, өөр газруудад амиа алдсан бөгөөд зарим нь галыг унтраах гэж байхдаа, нөгөө хэсэг нь түймэрт боогдсоны улмаас амиа алдсан гэж Кабили хотын оршин суугчид хэлэв. Мөн Батлан хамгаалах яамнаас олон цэрэг түлэгдэж хүнд бэртсэн болохыг баталжээ.

Даваа гарагийн шөнөөс хойш Алжирын хойд хэсэгт олон арван түймэр гарсан бөгөөд Дотоод хэргийн сайд Камел Белджуд гал тавьсан хүмүүсийг буруутгаж, энэ хэргийн талаар дэлгэрэнгүй мэдээлэл өгөөгүй байна.

Ерөнхий сайд Айман Бенабдеррахмане өнгөрсөн мягмар гарагийн орой улсын телевизээр мэдээлэл өгөхдөө засгийн газар онгоц хөлсөлж, түймэр унтраах үйл явцыг хурдасгах талаар гадаад холбоотнуудтай яриа хэлэлцээр хийж байгааг дурджээ.

Олон байшин түймэрт өртсөний улмаас иргэдийг зочид буудал, их сургуулийн дотуур байрууд руу нүүлгэн шилжүүлсэн байна. Гал сөнөөгчид болон арми түймрийг унтраах гэж оролдсон хэвээр байгаа бөгөөд албаны хүмүүсийн хэлснээр илүү олон хүний амь хохирохоос зайлсхийх нь нэн тэргүүний зорилт юм.

Эх сурвалж: Reuters

#ойн түймэр