Д.Амарбаясгалан: Батлан хамгаалахын сайд Г.Сайханбаярт ёс зүйн хариуцлага хүлээлгэж, нэр дэвшигчээс эргүүлэн татаж байна

Өвөрхангай аймгийн Сант сумын АН-ын дарга Б зургаадугаар сарын 16-нд бусдын гарт амиа алдсан хэрэг гараад буй. Энэ хэрэгт холбогдогч О нь МАН-ын ухуулагчаар ажиллаж байсан нэгэн гэдгийг АН-аас мэдэгдэж, хатуу хариуцлага тооцохыг өнөөдөр шаардсан юм.

Энэ асуудалд холбогдуулан МАН-аас шуурхай мэдээлэл хийж, мэдэгдэл гаргалаа.

Тодруулбал, ЗГХЭГ-ын дарга Д.Амарбаясгалан "Өвөрхангай аймгийн Сант суманд энэ сарын 15-16-нд шилжих шөнө хүний амь нас хохирсон эмгэнэлт явдал гарсанд талийгаачийн ар гэр, төрөл төрөгсдөд гүн эмгэнэл илэрхийлж байна. 

Хэрэгт холбогдон шалгагдаж буй иргэн П.Отгонбаатар нь УИХ-ын нэгдүгээр тойрогт МАН-аас нэр дэвшигч Г.Сайханбаярын штабтай гэрээ байгуулан ухуулагчаар ажиллаж байсан тул Г.Сайханбаярт ёс зүйн хариуцлага хүлээлгэж, нэр дэвшигчээс эргүүлэн татах улс төрийн шийдвэрийг МАН-ын сонгуулийн төв штабаас гаргалаа. Хуулийн хяналтын байгууллагуудын холбогдох дүгнэлт гартал эрдэнэт хүний амь нас эрсэдсэн асуудлыг улс төржүүлэхгүй байхыг улс төрийн бусад нам болон нэр дэвшигчдэд уриалж байна" гэлээ.