Австралийн цагдаа нар Ассирийн сүмд болсон хэргийг "террорист халдлага" гэж тодорхойлжээ

Австралийн цагдаа нар Сидней дэх Ассирийн сүмд болсон зэвсэгт халдлагыг шашны хэт даврагч үзлийн сэдэлтэй террорист ажиллагаа байсан гэж мэдэгджээ.

Даваа гарагт Сиднейн баруун захын Уэйкли дэх Ассирийн Христ Сайн Хоньчин Сүмийн номлолын үеэр бишоп Мар Мари Эммануэлийг оролцуулаад дөрвөн хүн хутгалуулж шархадсан юм.

Энэ үйл явдлын улмаас сүмийн гадаа хамба ламыг дагадаг олон хүн халдлага үйлдсэн этгээдийг тэдэнд өгөхийг шаардаж, цагдаа нартай мөргөлдсөн байна.

Цагдаа нар халдлагыг үйлдсэн гэх 15 эрэгтэй хүүхдийг хэргийн газарт баривчилсан ч гадаа цугларсан сүсэгтнүүдээс болоод түүнийг сүм дотор байлгахаас өөр аргагүй болжээ.

Шинэ Өмнөд Уэльс мужийн цагдаагийн комиссар Карен Уэбб хэвлэлийн бага хурлын үеэр “Бид шашны сэдэлттэй хэт даврагч үзэлд хөтлөгдсөн гэдэгт итгэлтэй байна. Бүх материалтай танилцсаны дараа би үүнийг террорист ажиллагаа гэж тодорхойлсон” гэж мэдэгдэв.

Халдлага үйлдэгч гэрээсээ хол зайд байрлах сүм рүү хутга барьж очсон нь “урьдчилан төлөвлөсөн” үйлдэл гэж цагдаа нар мэдэгдэв. Мөрдөн байцаалтын эхний шатанд цагдаа нар халдлага үйлдэгчийг хэргийг ганцаараа үйлдсэн гэж дүгнэсэн байна.

Яаралтай тусламжийн багийнхан сүмийн гадаа болсон мөргөлдөөний дараа 30 орчим хүнд тусламж үзүүлсэн бөгөөд долоо нь шархадсан байдалтай эмнэлэгт хүргэгдсэн гэж мэдэгдэв. Түүнчлэн хэд хэдэн цагдаа шархадсан байдалтай эмнэлэгт хүргэгдэж, цагдаагийн 20 машин эвдэрсэн байна.

Энэ нь Австралийн хамгийн их хүн амтай Сидней хотын худалдааны төвд хутгатай халдлагын улмаас зургаан хүн амь үрэгдэж, 12 хүн шархадсанаас гуравхан хоногийн дараа болж буй томоохон халдлага юм.

Эх сурвалж: Reuters