Сидней хотын худалдааны төвд таван хүний амийг хөнөөсөн этгээд цагдаагийн гарт амиа алджээ

Өнөөдөр Австралийн Сидней хотын нэгэн худалдааны төвд зэвсэгт этгээд таван хүнийг хутгалж алсан хэрэг гарчээ.

Уг хэрэг орон нутгийн цагаар 16:00 цагийн үед Сидней хотын хөл хөдөлгөөн ихтэй “Westfield Bondi Junction” худалдааны төвд болсон байна. 

Халдлага үйлдэгч худалдааны төв дотор байсан олон хүн, түүний дотор есөн сартай хүүхдийг хутгалж гэмтээсэн бөгөөд үүнийхээ дараа хэргийн газрын ойролцоо байсан офицерт буудуулж амиа алджээ.

Хохирогчдын тав нь амь үрэгдсэн, найман хүнийг эмнэлэгт хүргэсэн болохыг Шинэ Өмнөд Уэльсийн түргэн тусламжийн албаны төлөөлөгч мэдэгдэв. Эмнэлэгт хүргэгдсэн зарим хохирогчийн биеийн байдал хүнд байгаа гэв.

Тухайн этгээд хэргийг ганцаараа үйлдсэн гэдгийг Шинэ Өмнөд Уэльсийн цагдаагийн туслах комиссар Энтони Күүк хэвлэлийн бага хурлын үеэр мэдэгджээ. Цагдаа нар хэрэг үйлдэх болсон сэдлийг шалгаж байгаа аж.

Австралийн Ерөнхий сайд Антони Албанесс олон нийтийн сүлжээний “X” платформд “Бид хохирогчдод эмгэнэл илэрхийлэхийн зэрэгцээ тэдэнд санаа тавьсан цагдаа, анхны тусламжийн багийнханд талархал илэрхийлж байна” хэмээн жиргэсэн байна.

Эх сурвалж: BBC