Хойд Солонгос Орос руу 6,700 чингэлэг сум илгээсэн гэж Өмнөд Солонгос мэдэгдэв

Долдугаар сараас хойш Хойд Солонгос Украины эсрэг явуулж буй дайнд дэмжлэг үзүүлэх зорилгоор 6,700 орчим чингэлэг зэвсгийг Орос руу илгээсэн гэж Өмнөд Солонгосын хэвлэл мэдээллийн хэрэгслүүд мягмар гарагт Батлан хамгаалахын сайдаас иш татан мэдээлэв.

Даваа гарагт хийсэн хэвлэлийн бага хурлын үеэр Шин Вон Сик нь ийм тооны чингэлгээр 3 сая гаруй 152 мм-ийн их бууны сум эсвэл 500,000 122 мм-ийн сум тээвэрлэх боломжтой гэж мэдэгджээ.

“Гэхдээ хоёулангаас нь тээвэрлэсэн байж магадгүй бөгөөд дор хаяж хэдэн сая сум илгээсэн гэж хэлж болно.”

Хойд Солонгосын олон зуун зэвсгийн үйлдвэрүүд түүхий эд, цахилгаан эрчим хүчний хомсдолоос болж хүчин чадлынхаа 30 орчим хувьтай ажиллаж байгаа ч Орост зориулж их бууны сум үйлдвэрлэдэг үйлдвэрүүд нь бүрэн хүчин чадлаараа ажиллаж байна гэж тэрээр нэмж хэлэв.

Харин АНУ-ын Төрийн департамент Хойд Солонгосыг есдүгээр сараас хойш Орост 10,000 гаруй чингэлэг сум болон холбогдох материал нийлүүлсэн гэж үзэж байна.

Хариуд нь Хойд Солонгос голдуу хүнсний хангамж бүхий 9,000 орчим чингэлэг хүлээн авсан нь Умардад хэрэглээний бараа бүтээгдэхүүний үнийг тогтворжуулахад тусалсан гэж Шин хэлэв.

Мөн долдугаар сараас хойш Орос улс Хойд Солонгос руу Хойд Солонгосын илгээснээс бараг 30%-иар илүү чингэлэг илгээсэн гэсэн тоо баримтыг Шин иш татсан байна.

Түүний хэлснээр Москва техникийн туслалцаа үзүүлж байгаа бөгөөд үүний ачаар Хойд Солонгос ирэх сарын эхээр дахин нэг хиймэл дагуул хөөргөхөөр төлөвлөж байгаа гэв. Пхеньян мөн агаарын хөлөг болон газрын хөдөлгөөнт төхөөрөмжийн технологийн тал дээр Оросоос тусламж хүссэн гэж Шин хэлжээ.

Эх сурвалж: Reuters