ДЭЛХИЙН МЭДЭЭ

Хятад эр 24 жилийн өмнө хулгайлагдсан хүүгээ олжээ

Ц.ХУЛАН/NEWSWIRE.MN

2021-07-14

Хятад эр 24 жилийн өмнө хулгайлагдсан хүүгээ хайн улс даяар 500,000 гаруй километрийг мотоциклоор туулсны эцэст хүүгээ олжээ.

Гуо Гангтангийн хүүг хоёр настай байхад хүний ​​наймаачид Шаньдун муж дахь гэрийнх нь урдаас хулгайлсан байна. Тухайн үед Тан овогтой эмэгтэй гэрийнхээ гадаа ганцаараа тоглож байсан хүүг хулгайлж, найз залуу болох Хутай автобусны буудал дээр уулзжээ. Дараа нь хосууд хөрш Хэнань муж руу явж, хүүг тэнд зарсан байжээ.

1997 онд хүү нь хулгайлагдсаны дараа ноён Гуо хүүгийнхээ зурагтай самбарыг мотоциклдоо зүүж, 20 гаруй мужаар явсан байна. Тэрээр хүүгээ эрэн хайх ажилд бүх хуримтлалаа зарцуулсан бөгөөд мөнгөгүй болохдоо гүүрэн дор хоноглож, гуйлга гуйж байжээ. Мөн энэ хугацаанд тэрээр зам тээврийн осолд орж, хурдны замын дээрэмчидтэй таарч, арван удаа мотоциклоо сольсон гэнэ.

Ноён Гуо сэтгүүлчдэд “Хүү маань олдсон тул одооноос л бүх зүйл аз жаргалтай болж чадна” гэж хэлжээ.

Хүүгээ хайж байхдаа тэрээр Хятадын сураггүй алга болсон хүмүүсийн байгууллагын нэр хүндтэй гишүүн болж, долоон эцэг эхэд хулгайлагдсан хүүхдүүдээ олоход нь тусалсан юм. Түүнчлэн түүний түүхээс сэдэвлэн 2015 онд кино бүтээж, гол дүрд нь Хонконгийн алдарт жүжигчин Энди Лау тоглосон билээ.

2015 онд Хятадад жил бүр 20,000 хүүхдийг хулгайлдаг гэсэн тооцоо гарсан бөгөөд тэдгээрийн олонх нь дотоодод болон гадаадад үрчлэгдэж зарагддаг байна.

Эх сурвалж: BBC