НАТО Хүйтэн дайнаас хойших хамгийн том сургуулилалтаа 90,000 цэрэгтэйгээр хийх гэж байна

НАТО Хүйтэн дайнаас хойших хамгийн том сургуулилалтаа эхлүүлж байгаа бөгөөд хэрэв дайсантай мөргөлдөөн үүсвэл АНУ-ын цэргүүд Оростой хиллэдэг Европын орнууд болон эвслийн зүүн жигүүрт байрлах холбоотнуудыг хэрхэн бэхжүүлэх талаар бэлтгэл хийх гэнэ.

Пүрэв гарагт эвслийн командлагч Крис Каволийн хэлснээр тавдугаар сарыг дуустал үргэлжлэх “Тогтвортой хамгаалагч-2024” сургуулилтад 90,000 орчим цэрэг оролцох аж.

Нисэх онгоц тээвэрлэгчээс эхлээд сөнөөгч хүртэл 50 гаруй хөлөг онгоц, түүнчлэн 80 гаруй тийрэлтэт сөнөөгч онгоц, нисдэг тэрэг, нисгэгчгүй онгоц, мөн 133 танк, 533 явган цэргийн байлдааны машин зэрэг 1,100 гаруй байлдааны машин техник оролцоно гэж НАТО мэдэгдэв.

Каволи хэлэхдээ уг сургуулилалтаар НАТО-ийн сүүлийн хэдэн арван жилийн хугацаанд боловсруулсан анхны батлан хамгаалах төлөвлөгөө болох “ойрын дайсны” довтолгоонд хэрхэн хариу өгөх талаар нарийвчилсан төлөвлөгөөг хэрэгжүүлэх бэлтгэл хийх аж.

НАТО мэдэгдэлдээ Оросын нэрийг дурдаагүй боловч стратегийн дээд баримт бичигт тус улсыг эвслийн гишүүн орнуудын аюулгүй байдалд шууд заналхийлж буй хамгийн чухал хүчин гэж тодорхойлсон байдаг.

“Тогтвортой Хамгаалагч 2024 нь НАТО Европын хамгаалалтыг бэхжүүлэхийн тулд Хойд Америк болон эвслийн бусад хэсгээс цэргийн хүчийг түргэн шуурхай байршуулах чадварыг харуулах болно” гэж НАТО мэдэгдэлдээ дурджээ.

НАТО-ийн мэдээлснээр ижил хэмжээтэй сургуулилалт хамгийн сүүлд 1988 онд Хүйтэн дайны үед 125,000 цэрэгтэйгээр, 2018 онд 50,000 цэрэгтэйгээр зохион байгуулагдаж байжээ.

Сургуулилалтын нэгдүгээр хэсэгт “ойролцоох дайсантай мөргөлдөөн болж буй хувилбараар загварчлал хийж”, ийм үед нэмэлт хүчийг дайчлах бэлтгэл хийх бол хоёрдугаар хэсэгт НАТО-ийн шуурхай хүчийг Польш руу эвслийн зүүн жигүүрт байрлуулахад онцгой анхаарал хандуулна гэж Каволи хэлэв.

Сургуулилалтад НАТО-ийн орнууд болон удахгүй тус холбоонд нэгдэнэ гэж найдаж буй Шведийн цэргүүд оролцоно. Мөн Оросын болзошгүй дайралтад өртөх хамгийн өндөр эрсдэлтэй гэж үздэг Балтын орнууд, Герман, Норвеги, Румын зэрэг эвслийн захын орнуудад сургуулилалт хийх гэнэ.

Эх сурвалж: Reuters