БАЯН-ӨЛГИЙ: Орон нутагт халаалтын шингэн үйлдвэрлэж эхлэв

Баян-Өлгий аймгийн "Марал инфинит" компани орон нутагт "Хүйтний оргил" нэртэй халаалтын шингэн буюу ахуйн тосол үйлдвэрлэж эхэллээ.

Тус компани нь нэг удаагийн үйлдвэрлэлээр 500 кг, өдөрт 2 тонн хүртэл ахуйн тосол үйлдвэрлэх хүчин чадалтай аж.

"Бидний үйлдвэрлэсэн бүтээгдэхүүн -30 хэмийн хүйтэн, +108 хэмийн халууныг тэсвэрлэх бөгөөд айл өрхийн энгийн халаалтад хэрэглэнэ. Муудахгүй, ууршихгүй, зэврүүлэхгүй тул халаалтын системд нэг удаа хийсэн шингэнийг 5 жилийн турш ашиглаж болдог онцлогтой. Үнийн хувьд Улаанбаатар хотод үйлдвэрлэж байгаа ижил төрлийн бүтээгдэхүүнүүдээс 500-1000 төгрөгөөр хямд гарч байна" хэмээн компанийн захирал А.Студент хэлэв.

"Марал инфинит" компани ирэх оноос тээврийн хэрэгслийн хөргөлтийн шингэн үйлдвэрлэхээр төлөвлөж байна.