Крымийн ойролцоо 11, Москваг чиглэн нисэж байсан 2 нисгэгчгүй онгоцыг устгаснаа Оросын тал мэдэгдэв

Өнгөрсөн шөнө Крымийн ойролцоо 11 нисгэгчгүй онгоц, мөн нийслэл Москвагийн зүг нисэж байсан хоёр нисгэгчгүй онгоцыг устгаснаа Оросын Батлан хамгаалах яам пүрэв гарагт мэдэгджээ.

Тус яам “Москва хотын чиглэлд нисэж байсан хоёр нисгэгчгүй онгоцыг устгасан” гэж “Telegram” дахь мэдэгдэлдээ дурдсан байна.

Түүнчлэн Украины хоёр нисгэгчгүй онгоцыг Крымийн эрэг дэх Севастополь хотын ойролцоо буудаж унагасан бөгөөд “өөр есөн онгоцыг цахим аргаар зогсоож, Хар тэнгист унагасан” гэж мэдэгджээ.

Эд материалын хохирол гараагүй, хүний амь нас эрсдээгүй байна.

Өмнөх өдөр нь мөн Оросын Агаарын довтолгооноос хамгаалах хүчин Москваг чиглэн нисэж байсан Украины хоёр байлдааны нисгэгчгүй онгоцыг устгасан болохыг Кремль мэдэгдсэн бөгөөд сүүлийн халдлага нь Москвагийн ойролцоо долоо хоногийн дотор болж буй дөрөв дэх удаагийн халдлага юм.

Украины дайн эхэлснээс хойш жил гаруйн хугацаанд нийслэл Москва халдлагын бай болж байгаагүй ч сүүлийн саруудад дараалсан халдлагууд болж байна.

Саяхан Украины Ерөнхийлөгч Володимир Зеленьский “дайн Орос руу эргэж” байгааг анхааруулсан билээ.

Эх сурвалж: The Guardian