ДЭЛХИЙН МЭДЭЭ

Жо Байден татвар нэмэхээр төлөвлөж байна

АНУ-ын Төрийн тэргүүн Жо Байден 1993 оноос хойших хамгийн том татварын өөрчлөлтийг хийхээр төлөвлөж байгааг “Блүүмберг” мэдээлжээ. Эдийн засгийн урт хугацааны хөтөлбөрүүдийг санхүүжүүлэхийн тулд тэрбээр татварыг сүүлийн 28 жилд байгаагүйгээр нэмэх шаардлагатай нүүр тулж байгааг  эх сурвалжууд онцолж байна. Татвар нэмэх талаар өнгөрсөн онд болсон Ерөнхийлөгчийн сонгуулийн үеэр ч Жо Байден мэдэгдэж байсан билээ.

Ингэхдээ Төрийн тэргүүн асан Дональд Трампын баталсан татварын тухай хуулийн зарим заалтыг хасаж, өөрчлөлт оруулах бололтой. Тодруулбал, корпорацийн татварыг 21 хувиас 28 хувь болгон нэмж, ХХК-ийн (LLC) татварын хөнгөлөлтийг цуцалж магадгүй болов. Мөн өндөр орлоготой иргэдэд илүү татвар ногдуулж магадгүй. Тухайлбал, жилд 400 мянган ам.доллароос дээш орлоготой иргэд илүү татвар төлж таарах нь.

Татварын энэхүү өөрчлөлт нь Жо Байдены хувьд эдийн засгийн санаачилга, хөтөлбөрүүдээ хэрэгжүүлэх арга зам төдий биш татварын тогтолцоонд олон жилийн турш бугшсан гажуудлыг арилгахад чиглэж буй бодлого гэж “Блүүмберг” уламжилжээ. Татварын ийм өөрчлөлтийг хийснээр орлогын зөрүүг багасгаж, нийгэмд газар авч буй тэгш бус байдлыг бууруулна гэж Ардчилсан намынхан үзэж байна. Татварыг ийнхүү нэмэх асуудлыг Сенатаар хэлэлцэж батлахын Бүгд найрамдах намын сенатчдын дэмжлэг Жо Байденд хэрэгтэй болно гэж ажиглагчид онцолсон. Харин Сенат дахь Бүгд найрамдах намын бүлгийн дарга Митч Макконнел татварыг асуудлыг нарийвчлан хэлэлцэнэ гэдгээ илэрхийлээд буй.

Эх сурвалж: Блүүмберг

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet