Украины хүчин Оросын мэдэлд байдаг Донецк хотын төв рүү 40 пуужин харважээ

Орос Зул сарын баяраар гал зогсоохыг үгүйсгэснээс нэг өдрийн дараа Украины арми Оросын хяналтад байдаг зүүн Донецкд пуужингаар цохилт өгчээ.

Оросын дэмжлэгтэй Донецкийн тэргүүн Алексей Кулемзины хэлснээр Украин өглөөний долоон цагийн орчимд хотын төв рүү “БМ-21 Град” олон пуужин харвагчаас 40 пуужин харвасан байна.

Кулемзин халдлагыг 2014 онд Москваг дэмжигч салан тусгаарлагчид хотод хяналтаа тогтоосноос хойш Донецкд болсон хамгийн том халдлага гээд, үүнийг дайны гэмт хэрэг гэж үзэж байгаагаа мэдэгджээ.

Хотын төвд байрлах орон сууцны барилга, оффисын барилга, цэцэрлэг, сүмд гэмтэл учирсан бичлэг олон нийтийн сүлжээнд нийтлэгдсэн байна.

Мөн халдлагын улмаас таван хүн, түүний дотор нэг хүүхэд шархадсан болохыг Оросын хэвлэл мэдээлжээ.

Одоогоор Украин ямар нэг тайлбар хийгээгүй байна.

Украины Зэвсэгт хүчний жанжин штаб өдөр тутмын тайландаа Москвагийн анхаарал зүүн хэсгийн Бахмут, Авдиевка хотуудад төвлөрсөөр байгаа бөгөөд Украины хүчин сүүлийн 24 цагийн дотор Оросын довтолгоог няцаасан гэж мэдэгджээ.

Мөн Оросын арми Донецк муж болон өмнөд хэсгийн Запорожье, Херсон мужуудад Украины цэргүүд болон иргэний дэд бүтцэд цохилт өгсөөр байгааг дурдсан байна.

Одоогоор Украины зүүн болон өмнөд хэсэгт голчлон өрнөж буй дэлхийн хоёрдугаар дайнаас хойших Европын хамгийн том мөргөлдөөнийг зогсоох талаар яриа хэлэлцээр Москва, Киев хоёрын дунд өрнөх төлөвгүй байна.

Гэсэн ч энэ долоо хоногт Украины Ерөнхийлөгч Володимир Зеленский мөргөлдөөнийг зогсоох алхам болгон Орос улс Зул сарын баяраар цэргээ татаж эхлэх хэрэгтэй гэж мэдэгдсэн. Харин Москва уг саналыг няцааж, ямар нэгэн ахиц дэвшил гаргахаас өмнө Украин Орост газар нутгаа алдсан гэдгээ хүлээн зөвшөөрөх ёстой гэж мэдэгдсэн байна.

Лхагва гарагт Кремлийн хэвлэлийн төлөөлөгч Дмитрий Песковоос “Зул сарын баяраар гал зогсоох” саналыг хэлэлцэх эсэхийг асуухад “Үгүй ээ, хэнээс ч ийм санал ирээгүй. Энэ сэдэв хэлэлцэх асуудлын жагсаалтад байхгүй” гэж сэтгүүлчдэд хариулжээ.

Эх сурвалж: Reuters