Ши Жиньпин Внуково нисэх онгоцны буудалд газарджээ

БНХАУ-ын дарга Ши Жиньпин Оросын Ерөнхийлөгч Владимир Путинтэй уулзахаар Москвад хүрэлцэн ирсэн тухай “Reuters” агентлаг Хятадын төрийн мэдээллийн “CCTV” сувгаас иш татан мэдээлжээ.

Хятадын удирдагчийн онгоц Москвагийн цагаар 12:59 цагт нийслэлийн Внуково нисэх онгоцны буудалд газардсан байна.

Ши нь Москвад газардсаныхаа дараа Путинтэй албан бус хэлэлцээр хийж, дараа нь оройн зоог барих гэнэ.

Мягмар гарагт айлчлал албан ёсны хэлэлцээрээр үргэлжилж, хоёр орны удирдагч хамтарсан тунхаг бичигт гарын үсэг зурах төлөвтэй байна.

“Хятад, Орос хоёр бол сайн хөрш, найдвартай түнш юм. Хятад улс Оростой хамт олон улсын хууль тогтоомжийн дагуу дэлхийн дэг журмыг сахин хамгаалахад бэлэн байна” гэж Ши төрийн айлчлалын өмнө мэдэгдсэн болохыг Оросын төрийн мэдлийн “Тасс” агентлаг мэдээлсэн байна.

“Тасс” агентлаг үргэлжлүүлэн уг айлчлалыг “Орос-Хятадын харилцаа, стратегийн хамтын ажиллагааг хөгжүүлэхэд шинэ түлхэц өгнө” хэмээн тодорхойлжээ.

Эх сурвалж: Reuters