Энэ сарын 11-ээс АНУ-ын гадаадын жуулчдад зориулсан ковидын вакцинжуулалтын дүрэм дуусгавар болно

Тавдугаар сарын 11-ээс АНУ гадаадаас ирж буй аялагчдыг хамарсан Ковид-19-ийн вакцинжуулалтын шаардлагаа зогсоохоор болжээ.

Хоёрдугаар сард АНУ-ын Төлөөлөгчдийн танхим гадаадаас ирж буй ихэнх зорчигчдод зориулсан Ковид-19-ийн эсрэг вакцинд хамрагдсан байх шаардлагыг цуцлахаар санал хураалт явуулсан юм.

Өнгөрсөн зургадугаар сард Байдены засаг захиргаа АНУ-д агаараар ирсэн хүмүүс шинжилгээний сөрөг хариутай байх ёстой гэсэн шаардлагыг цуцалсан боловч ихэнх гадаадын аялагчдад зориулсан Өвчний хяналт, урьдчилан сэргийлэх төв (CDC)-ийн вакцинжуулалтын шаардлагыг хэвээр үлдээж байв.

Мөн тавдугаар сарын 12-ны өдрөөс эхлэн хуурай замын боомт, усан онгоцоор дамжин АНУ-д нэвтэрч буй гадаадын иргэдийг Ковид-19-ийн эсрэг вакцинд хамрагдсан байхыг шаардахгүй, вакцин хийлгэсэн нотлох баримт өгөхийг шаардахгүй гэж Дотоодын аюулгүй байдлын яам даваа гарагт мэдэгдэв.

Хэдийгээр энэ жил ковидын тохиолдол, эмнэлэгт хэвтэх, нас баралт эрс буурсан ч АНУ-д долоо хоногт 1,000 гаруй хүний амь нас хохирсоор байгаа аж.

Эх сурвалж: Reuters