COVID-19

ДЭМБ: Хятад улс коронавирусийн халдварын талаар дэлхий нийтэд хожимдож мэдээлсэн

Коронавирусийн уг гарал, вирус тээгчээс хэрхэн хүнд халдварласныг судалж буй ДЭМБ-ын мэргэжилтнүүд халдварын талаар БНХАУ хожуу мэдээлсэн гэж үзэж байгааг CNN онцолжээ. Тодруулбал, БНХАУ коронавирусийн талаар мэдээлэхээс нэлээд  өмнө Хубэй мужийн Ухань хотод халдвар гарсан  гэж тэд үзэж байна.

ДЭМБ-ын мэргэжилтэн Питер Бен Эмбарек 2019 оны арванхоёрдугаар сарын сүүлчээс өмнө коронавирусийн хэд хэдэн төрөл илэрсэн байж магадгүй талаар онцолжээ. 2019 оны арванхоёрдугаар сарын 8-нд коронавирусийн халдвар авсан хүнтэй мэргэжилтнүүдийг уулзуулсан тухай тэрбээр мөн мэдэгдсэн.

Хятадын тал коронавирусийн халдвар авсан  174 хүний мэдээллийг ДЭМБ-ын багт хүлээлгэн өгсөн бөгөөд тэдний 100-гийнх нь оношийг лабораторид баталсан, 74-т нь илэрсэн шинж тэмдгээр коронавирусийн халдвартайг нь тогтоосон аж. Өвчтнүүдийн 15 хувьд нь хүнд хэлбэрийн өвчлөл ажиглагдсан байна. Питер Бен Эмбарекийн таамаглаж буйгаар, тухайн үед халдвар авсан бүх тохиолдлыг илрүүлж чадаагүй, арванхоёрдугаар сарын үед 1000 орчим хүн өвдсөн байж магадгүй аж.

Хятадын тал коронавирусийн эрт үеийн тохиолдлуудын талаарх мэдээллийг ДЭМБ-ын мэргэжилтнүүдэд өгөхөөс татгалзсан гэж өмнө нь “Нью-Йорк таймс” мэдээлсэн билээ. Тэгвэл энэ мэдээллийг Бээжин няцааж, коронавирусийн халдвар авсан бүх хүний мэдээллийг бус, жишээ болгон хэд хэдэн тохиолдлын шинжилгээ, түүхийг мэргэжилтнүүдийн багт өгсөн гэж мэдэгдсэн юм.

Мөн багийн гишүүн Питер Дашакийн мэдэгдсэнээс үзвэл, вирусийн халдвар анх Хятадын өмнөд хэсэг, Зүүн өмнөд Азид сарьсан багваахайгаар дамжин тархсан байх магадлалтай ажээ. Тэрбээр энэ талаар “Сарьсан багваахайнаас зэрлэг амьтан, мэрэгчид халдан, тэндээс хүнд халдварласан байх магадлалтай” гэсэн байна.

Эх сурвалж: CNN

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet