Путины дараагийн бай Зүүн Европын Молдав байж магадгүй гэж шинжээчид анхааруулж байна

Украины дайн эхэлснээс хойш гурван долоо хоног өнгөрч байна. Энэ үед Ерөнхийлөгч Владимир Путины дараагийн зорилт Молдав байж магадгүй гэж шинжээчид анхаарууллаа.

Эрсдэлийн удирдлагын “Rane” компанийн дүн шинжилгээ хариуцсан захирал Адриано Босони “CNBC”-д ярилцлага өгөхдөө “Хэрэв мөргөлдөөн Украины хүрээнээс цааш хурцадвал Молдав улс жагсаалтын хамгийн дээгүүр жагсаж буй орнуудын нэг” гэжээ.

Украины баруун хил дээр оршдог, далайд гарцгүй, зүүн Европын Молдав улс Украин шиг Европын холбооны нэг хэсэг биш, НАТО-гийн гишүүн ч биш, гэхдээ аль алиных нь гишүүн болох сонирхолтой. Украины нэгэн адил хуучин ЗХУ-ын бүрэлдэхүүнд байсан тус улсын Украины хил дээр Приднестровийн салан тусгаарласан мужид Оросын талыг баримтлагчид суурьшсан байдаг.

Кремлийн дэмжлэгтэй удирдагчаар удирдуулдаг Приднестровийн Молдавын бүгд найрамдах улс нь тус бүс нутагт аль хэдийн 1500 орчим цэргээ цуглуулаад байгаа Оросын хувьд стратегийн боломжийг олгож магадгүй юм.

Путин Украин руу бүрэн довтлохоосоо өмнө Донецк, Луганск мужуудыг тусгаар тогтносон улс гэж хүлээн зөвшөөрсөнтэй адил үйлдэл хийж магадгүй. Эсвэл Оросын хөндлөнгийн оролцоог зөвтгөх зорилготой зохиомол үйл явдлын гол цэг болж магадгүй гэж Босони хэлэв.

“Миний хувьд Орос улс Приднестровийг Луганск, Донецктой адил тусгаар тогтносон бүгд найрамдах улс гэдгийг хараахан хүлээн зөвшөөрөөгүй байгаа нь маш сонирхолтой. Хэрэв Орос ингэвэл тэд мөргөлдөөнийг Молдав руу аваачих бодолтой байгаагийн ноцтой илрэл байх болно” гэж хэлэв.

Босони хэлэхдээ Путин Молдав улсад ийм стратеги төлөвлөж байгаа гэсэн тодорхой шинж тэмдэг одоогоор ажиглагдаагүй, гэхдээ нөхцөл байдлыг “магадлал бага, эрсдэл өндөр” гэж тодорхойлов.

Хэрэв Путин Молдав руу довтолбол Молдав эсэргүүцэж чадахгүй гэж Гадаад бодлогын судалгааны хүрээлэнгийн судлаач Клинтон Уоттс хэлж байна. Нэг хүнд ногдох ДНБ-ий хэмжээгээрээ Европын хамгийн ядуу орны нэгд тооцогддог тус улс Украинаас хамаагүй бага цэргийн хүчин чадалтай.

Тиймээс Молдав руу довтлоод, эзэлж чадвал Путин Украины баруун өмнөд хэсэгт арын хаалгатай болж болзошгүй, ялангуяа Оросын нийслэл Киевийг бүслэх оролдлого амжилтгүй болсон тул Путин өөр төлөвлөгөө хайж байх өндөр магадлалтай болохыг Уоттс тэмдэглэв.

Хэрэв ийм зүйл тохиолдвол Молдав Украинтай адил хувь тавилантай тулгарч магадгүй. Тус улсын Ерөнхийлөгч Майя Санду энэ сарын эхээр АНУ-ын Төрийн нарийн бичгийн дарга Антони Блинкентэй уулзах үеэрээ “Одоо бид энэ бүс нутагт аюулгүй байдлыг мэдрэх ямар ч боломж байхгүй байна” гэж хэлжээ.

Тухайн үед Блинкен тус улсад Америк дэмжлэг үзүүлнэ гэж амласан ч ЕХ эсвэл НАТО-гийн гишүүн биш бол аль ч байгууллага дорвитой тус болж чадахгүй.

Эх сурвалж: CNBC