Хойд Солонгос тив алгасагч баллистик пуужингийн хамгийн том туршилтаа хийсэн тухай Өмнөд Солонгос, Япон улсууд мэдэгдлээ

Пүрэв гарагт Хойд Солонгос тив алгасагч баллистик пуужингийн (ICBM) хамгийн том туршилтаа хийсэн гэж Өмнөд Солонгос болон Японы армиуд мэдэгдэв. Энэ нь АНУ-д цөмийн цохилт өгөх чадвартай зэвсгийн хөгжүүлэлтэд Хойд Солонгос томоохон ахиц гаргасныг илтгэж байгаа юм.

Японы эрх баригчдын мэдээлснээр “шинэ төрлийн” “ICBM” хөөргөх газраасаа 6,000 км-ийн өндөрт 71 минут ниссэн бөгөөд 1,100 км туулсан байна. Пуужин 15:44 цагт Японы хойд хэсгийн Аомори мужаас баруун тийш 170 км-ын зайд Японы эдийн засгийн онцгой бүсэд газардсан гэж эргийн хамгаалалт мэдэгдэв.

Харин Өмнөд Солонгосын штабын дарга нарын нэгдсэн хороо пуужин 6200 км-ийн өндрийг авч, 1080 км зам туулсан гэж мэдэгджээ.

2017 онд Хойд Солонгос “Hwasong-17” пуужинг хөөргөсөн ба пуужин 53 минутын турш нисэхдээ 4475 км-ийн өндрийг авч, 950 км-ийн зайг туулсан юм.

Албаны хүмүүс пүрэв гарагийн туршилтанд ямар төрлийн “ICBM” ашигласан талаар дэлгэрэнгүй мэдээлэл өгөөгүй ч АНУ болон Өмнөд Солонгосын албаны хүмүүс Хойд Солонгос хамгийн том “ICBM” болох “Hwasong-17” пуужингаа туршихаар бэлтгэж байгаа тухай саяхан анхааруулсан.

Шинжээчдийн үзэж байгаагаар "Hwasong-17" нь "Hwasong-15"-аас илүү том юм. Тус пуужинг анх 2020 оны 10-р сард ил гаргасан бол дараа нь 2021 оны 10-р сард хоёр дахь удаагаа олон нийтэд дэлгэж байв.

Эх сурвалж: Reuters