Пелоси Тайваньд хүрэлцэн ирж, Хятад арлын эргэн тойронд цэргийн сургуулилалтаа эхлүүллээ

АНУ-ын Төлөөлөгчдийн танхимын дарга Нэнси Пелоси болон бусад төлөөлөгч нар мягмар гарагийн орой Тайпэй хотын төвд байрлах нисэх онгоцны буудалд Агаарын цэргийн хүчнийхээ онгоцоор хүрэлцэн ирсэн. Тэднийг Тайванийн Гадаад хэргийн сайд Жозеф Ву, АНУ-аас тус улсад суугаа дээд төлөөлөгч Сандра Оудкирк нар угтан авлаа.

Пелоси Тайпэйд газардсаныхаа дараах мэдэгдэлдээ “Манай Конгрессын төлөөлөгчид Тайваньд айлчилж байгаа нь тус улсын ардчиллыг тууштай дэмжих АНУ амлалтандаа хүрдэг гэдгийг харуулах зорилготой юм. Дэлхий дахин дарангуйлал, ардчилал хоёрын аль нэгийг сонгох сонголтын өмнө нүүр тулаад байгаа өнөө үед Америк улс Тайванийн 23 сая хүн амтай эв санааны нэгдэлтэй байх нь урьд өмнөхөөсөө илүү чухал болоод байна” гэж хэлжээ.

АНУ-ын ерөнхийлөгчийн дараа хоёрдугаарт бичигдэж буй Пелоси Хятадыг удаан хугацаанд шүүмжилж ирсэн нэгэн юм.

Пелосигийн айлчлал мөн АНУ-ын сүүлийн 25 жилийн хугацаанд Тайваньд хийж буй хамгийн өндөр түвшний айлчлал гэдгээрээ онцлог болж байна.

Тайванийн Ерөнхийлөгч Цай Ин Вэн лхагва гарагийн өглөө Пелосиг хүлээн авч уулзаж, дараа нь хамт үдийн зоог барихаар төлөвлөсөн тухай ерөнхийлөгчийн тамгын газраас мэдээлжээ.

Тайванийг өөрийн нутаг дэвсгэрийн нэг хэсэг гэж үздэг, өөрийн мэдэлд оруулахын тулд хүч хэрэглэхээс хэзээ ч татгалзаж байгаагүй Хятад улс Пелосигийн айлчлалыг Тайванийн хоолойн энх тайван, тогтвортой байдалд заналхийлсэн, Хятад, Америкийн харилцаанд ноцтой нөлөөлсөн, Хятадын бүрэн эрх, нутаг дэвсгэрийн эрхийг ноцтой зөрчсөн үйлдэл гэж хүчтэй буруушааж байна.

Тэгвэл АНУ Хятадад хандан энэ айлчлалыг Тайванийн эсрэг цэргийн ажиллагаа явуулах шалтаг болгон ашиглахгүй байхыг сануулжээ.

Пелосиг ирэхээс өмнө Хятадын байлдааны онгоцнууд Тайванийн хоолойг заагладаг гол шугамын ойролцоо нислэг үйлдэж, байлдааны хөлгүүд тусгаарлах шугамын ойролцоо байрлаж, Хятадын ардын чөлөөлөх арми өндөржүүлсэн бэлэн байдалд шилжсэн.

Мөн Хятадын арми Тайванийн ойролцоо агаар болон тэнгисийн цэргийн хамтарсан сургуулилалт зохион байгуулж, Тайванийн зүүн хэсэгт пуужингийн туршилт хийхээ мягмар гарагийн орой зарлажээ. Хятадын төрийн мэдээллийн “Xinhua” агентлаг энэ талаар мэдээлэхдээ пүрэв гарагаас ням гараг хүртэл Тайванийг тойрсон галын сургуулилт болон бусад сургуулилалтууд болно гэж тайлбарлав.

Тайванийн Батлан ​​хамгаалах яамны мэдээлснээр мягмар гарагт Хятадын 21 нисэх онгоц агаарын довтолгооноос хамгаалах хамгаалалтын бүсэд нэвтэрсэн бөгөөд Хятад улс арлын эргэн тойронд сургуулилт хийж, гол боомт, хотуудыг заналхийлэхийг оролдсон байна. Тайванийн зэвсэгт хүчин бэлэн байдлын түвшингөө “бэхжүүлсэн” гэж нэмж мэдэгдэв.

Пелоси газардсаныхаа дараа айлчлалаа тайлбарлахдаа Тайванийн ардчилсан засгийн газрын төлөөх итгэл үнэмшлийг магтаж, Хятадыг Тайванийн асуудлаарх хурцадмал байдлыг улам нэмэгдүүлж байгааг шүүмжилжээ.

Тэрээр “Хятадын Коммунист Нам Тайвань болон ардчилсан үзэл баримтлалд заналхийлсээр байгаа үед бид зүгээр хараад зогсож болохгүй” гэж хэлсэн байна.

Мөн Пелоси Хятад улс Хонконг дахь улс төрийн эсэргүүцлийг “харгис хэрцгийгээр дарж”, лалын шашинт уйгурууд болон бусад цөөнхөд хэрхэн хандаж байгааг дурджээ.

Дөрвөн эх сурвалжийн мэдээлснээр тэрээр лхагва гарагт Хятадын хүний ​​эрхийн зөрчлийг ил тод шүүмжилдэг тэмцэгчидтэй уулзахаар төлөвлөсөн байна.

Эх сурвалж: Reuters