Туул голд урсаж байсан өсвөр насны хүүхдүүдийг аварчээ

Улаанбаатар хот, Хан-Уул дүүрэг 11 дүгээр хорооны “Задгай”-д өсвөр насны 2 хүүхэд Туул голд живэх гэж байна гэсэн дуудлагыг 08.17-ны өдрийн 14:51 цагт хүлээн авсан.  

Нийслэлийн аврах ангийн /завьт эргүүлд үүрэг гүйцэтгэж байсан/ алба хаагчдыг очиход иргэн Е /18 настай, эрэгтэй/, иргэн Э /15 настай, эрэгтэй/ нар нь Туул голын усанд сэлж байхдаа хөл алдаж 15-20 метр урсаж байсныг эсэн мэнд гаргасан гэж ОБЕГ-аас мэдээлэв. 

Иргэн бүрийн хариуцлагатай үйлдэл өөрийн болон бусдын амь насыг хамгаална.

Гол, нуурын усны түвшин, урсгалын хурд, гүн нь богино хугацаанд өөрчлөгддөг тул:
• Зориулалтын бус болон баталгаагүй хөвөгч хэрэгсэл ашиглахгүй байх,
• Согтууруулах ундаа хэрэглэсэн үедээ усанд орохгүй байх,
• Хүүхдийг гол, нуур, тогтоол усны орчимд хараа хяналтгүй орхихгүй байх,
• Голын гарцгүй болон хориглосон хэсгээр тээврийн хэрэгслээр зорчихгүй байх,
• Цаг агаарын сэрэмжлүүлэг, мэргэжлийн байгууллагын зөвлөмжийг дагаж мөрдөхийг анхааруулж байна.