Тулгар төрийн 2235 жил, Их Монгол Улс байгуулагдсаны 820, Үндэсний эрх чөлөө, тусгаар тогтнолоо сэргээн мандуулсны 115, Ардын хувьсгалын 105, Ардчилсан хувьсгалын 36 жилийн ойд зориулсан Үндэсний их баяр наадмын хурдан шүдлэнгийн уралдаан шимтэй болж өнгөрлөө.

Энэхүү насны ангилалд 223 үрээ бүртгүүлснээс 170 нь гарааны зурхай руу мордсон бөгөөд 53 нь хэмжилтээр хасагджээ.

Сэлэнгэ аймгийн Баруунбүрэн сумын харьяат, аймгийн алдарт уяач Э.Ариунболдын зээрд халзан түрүү магнайд хурдалж торгон жолоо өргүүлэн уясан эзэн, унасан хүүхдээ баярлууллаа.

Харин аман хүзүүнд Өмнөговь аймгийн Даланзадгад сумын харьяат уяач Э.Өлзийдэлгэрийн хүрэн хурдлав. Тэгвэл айргийн гуравт Ц.Золбоогийн зээрд, дөрөвт Монгол Улсын Тод манлай уяач Н.Хүрлээгийн зээрд, тавд Булган аймгийн Булган сумын харьяат Б.Ууганхүүгийн хүрэн шүдлэн барианд орлоо. 

Өнөөдрийн уралдаан сонгомол дунд насны ангиллаар өндөрлөнө. 

Гэрэл зургийг MPA.mn