НОБГ: Шүлхий өвчнөөс урьдчилан сэргийлэх ажлын хүрээнд нийслэлийн шалган нэвтрүүлэх цэгүүдээр хяналт шалгалт зохион байгуулна

Нийслэлийн хэмжээнд мал, амьтны халдварт шүлхий өвчнөөс урьдчилан сэргийлэх ажлыг эрчимжүүлсэн талаар НОБГ-аас мэдээлэл өгч байна. 

Нийслэлийн Засаг даргын 2026 оны “Шүлхий өвчнөөс урьдчилан сэргийлэх чиглэлээр авч хэрэгжүүлэх зарим арга хэмжээний тухай”  А/928 тоот захирамжийг хэрэгжүүлэх хүрээнд нийслэлийн авто тээврийн шалган нэвтрүүлэх товчоодод хяналт шалгалтыг эхлүүллээ.

Нийслэлийн Онцгой байдлын газар, Нийслэлийн Цагдаагийн удирдах газар, Нийслэлийн Мал эмнэлгийн газар, Тээврийн цагдаагийн албаны Замын цагдаагийн газрын хамтарсан бүрэлдэхүүн 2026 оны 06 дугаар сарын 25-ны өдрөөс 08 дугаар сарын 15-ны өдрийг хүртэл хугацаанд нийслэлийн нутаг дэвсгэрт авто тээврийн шалган нэвтрүүлэх товчоогоор зорчиж буй тээврийн хэрэгсэлд хяналт шалгалт хийнэ.

Түүнчлэн мал аж ахуй эрхлэхийг хориглосон бүсээс малыг гаргах, хүнсний зах, худалдааны төв болон мал төхөөрөх, мах боловсруулах үйлдвэрүүдэд мал, амьтны гоц халдварт шүлхий өвчнөөс урьдчилан сэргийлэх хяналт шалгалт, тандалт шинжилгээг хийж, тээврийн хэрэгсэлд халдваргүйжүүлэлт хийх ажлыг зохион байгуулан ажиллана.
Нийслэлийн хэмжээнд 317 мянган бог малыг дархлаажуулах ажил үргэлжилж байна.

НОБГ-ын Гамшгаас урьдчилан сэргийлэх, эрсдэлийн удирдлагын хэлтсийн дарга, дэд хурандаа Ж.Хаш-Эрдэнэ: Шүлхий өвчин нийслэлд тархахаас урьдчилан сэргийлэх зорилгоор шалгалтын ажиллагаа явуулж байна. Энэ хүрээнд 8-р сарын 15-ныг хүртэлх хугацаанд Улаанбаатар хот руу нэвтрэх тээврийн хэрэгслийг шалган, халдваргүйжүүлэх арга хэмжээг хэрэгжүүлнэ.

НМЭГ-ын Мал эмнэлгийн хорио цээр, баталгаажуулалт, хяналтын хэлтсийн дарга Х.Нямбаатар: Орон нутагт шүлхий өвчин тархсантай холбоотойгоор нийслэлд байгаа 317 мянга орчим бог малыг вакцинжуулах ажил үргэлжилж байна. Бог малын тоо олон Багануур дүүрэг болон Сонгинохайрхан дүүрэгт вакцинжуулалтын ажлыг ойрын хоёр хоногт дуусгана.

Гэрэл зургийг MPA.mn