Билл Гэйтс 2045 он хүртэл 200 тэрбум ам.долларыг буяны үйлсэд хандивлана

Ирэх 20 жилийн хугацаанд 200 тэрбум ам.долларыг нийгмийн сайн сайхны төлөөх буяны үйлсэд хандивлахаа Билл Гейтс мэдэгдлээ. Өдгөө 69 настай тэрбээр буяны сангаа 2045 оны арванхоёрдугаар сарын 31-нд хаахаар шийдсэнээ зарлаж, энэ хүртэл бараг бүх хөрөнгөө буяны үйлсэд зориулж, эмэгтэйчүүд, хүүхдүүдийн эндэгдлийг бууруулах, хумхаа болон саа зэрэг халдварт өвчнийг устгах, дэлхийн ядуурлыг бууруулахад хувь нэмрээ оруулна гэлээ. 

АНУ тэргүүтэй орнууд олон улсын тусламжийн санхүүжилтийг танах, зогсоох шийдвэрүүд гарч буй энэ үед "Сүүлийн хэдэн арван жилийн турш нас баралтын түвшин буурч байсан бол одоо эсрэгээрээ өсөх аюултай боллоо. Энэ нь сая сая хүний аминд хүрнэ” гэж Билл Гейтс мэдэгдэж байна.  Тухайлбал, АНУ-ын Олон улсын хөгжлийн агентлаг (USAID)-ийн төсвийг огцом бууруулж, 2023 оны байдлаар 44 тэрбум ам.доллар зарцуулж байсны 80 хувийг танах төлөвтэй болов.

Билл болон түүний эхнэр асан Мелинда Гэйтсийн хамтран байгуулсан буяны сан одоогоор нийт 100 тэрбум ам.долларыг ДОХ, сүрьеэ болон хумхаатай тэмцэх сангийн үйл ажиллагааг дэмжих болон вакцинжуулалтыг нэмэгдүүлэх үйлсэд хандивлаад байна.

Эх сурвалж: Reuters