Донтох эмгэгтэй иргэдэд сэтгэл зүйн үйлчилгээ үзүүлэх жишиг төв барина

Хар тамхи, архинд донтсон хүмүүсийг нийгэмшүүлэхэд чиглэсэн сэтгэц нийгмийн сэргээн засах төв байгуулна.

Гэрэл зургийг MPA.mn

Одоогоор СЭМҮТ болон нийслэлийн Аддиктологийн төв согтуурах, мансуурах донтой хүмүүст эмнэлгийн тусламж үйлчилгээ үзүүлж байна. Олон улсад энэ төрлийн эмгэгтэй хүнд хамгийн багадаа 3-6 сарын эмийн эмчилгээ хийж, гурван жилийн турш нийгмийн сэргээн засах эмчилгээнд хамруулснаар тодорхой үр дүнд хүрнэ гэж үздэг. Гэтэл манай улс хордлого тайлах, шарталтаас гаргах эмчилгээг дунджаар найм хоногт хийж байна. Энэ төрлийн эмчилгээг хүртээмжтэй болгохын тулд сэтгэц, нийгмийн сэргээн засах төвийг байгуулах шаардлага, хэрэгцээ байгааг "Мансууруулах, согтууруулах донтой хүмүүсийг эмчлэхэд тулгамдаж буй асуудал, гарц гаргалгаа" хэлэлцүүлгийн үеэр судлаач, мэргэжилтнүүд онцлов.

СЭМҮТ-ийн ерөнхий захирал Г.Анхболд хэлэхдээ, "Манай төвийн донтолтын тасаг 46 ортой. Энэ нь тусламж үйлчилгээ хүргэхэд хангалтгүй тоо юм. Аймаг, дүүргүүд дэх сэтгэцийн тасгийн амбулатори, хэвтүүлэн эмчлүүлэх орыг нэмж, сэтгэц нийгмийн сэргээн засах төв байгуулахыг зорьж байна. Ингэснээр тухайн иргэн оршин суугаа аймаг, дүүрэгтээ тусламж үйлчилгээ авах боломжтой. СЭМҮТ-өөс мэргэжил, арга зүйн зөвлөгөө өгнө" хэмээсэн юм.

Донтох эмгэгтэй иргэдэд нийгэм, сэтгэл зүйн тусламж үйлчилгээ үзүүлэх 2-3 жишиг төв энэ ондоо багтаан барина. Олон улсын сайн туршлага бүхий жишиг төв нь төрийн байгууллагын харьяа бус, энэ чиглэлээр үйл ажиллагаа явуулдаг аж ахуй нэгж, ТББ, олон нийтэд түшиглэн үйл ажиллагаа явуулдаг байна.

"Мон-дэм" ТББ-д жилд дунджаар мансууруулах, сэтгэцэд нөлөөлөх бодист донтсон 40 орчим иргэн сайн дураар ирж, эрүүл мэндийн тусламж үйлчилгээ авдаг байна. Тус байгууллага эмийн болон сэтгэл заслын эмчилгээ хийж, үүний дараа долоо хоногт нэг удаа тестийн сорил тавих, бүлгийн ярилцлагад хамруулан, зургаан сарын турш хянадаг аж. Ингэж эмчлэх нь тодорхой үр дүн гаргадгийг тус төвийн дарга Ц.Өлзийбаяр онцлов.

Тэрбээр хэлэхдээ “Олон улсын жишигт донтолтыг архаг хууч өвчин гэж үзэн, эмчлэхэд гурван жилийн хугацаанд эдгэнэ гэж үздэг. Бид эдгээр хүмүүстэй урт хугацаанд ажиллаж чадахгүй ч дахин донтохоос сэргийлж, нэг жил тодорхой хэмжээнд хяналт тавьдаг. Одоогоор эмчлүүлэгсдийн 60 хувь нь ямар нэгэн бодис дахин хэрэглээгүй, эдгэсэн байгаа. Жишээлбэл, 20 гаруй жил мансууруулах бодис хэрэглэсэн донтогч манайд сайн дураараа эмчлүүлсэн. Гүн шартсан, сэтгэл зүйн хямралтай энэ хүнд эмийн эмчилгээнээс гадна сэтгэл заслын болон ганцаарчилсан, бүлгийн ярилцлагыг түлхүү  хийснээр сайжирсан. Мөн хөдөлмөр эрхлэх боломж олгож, дөрвөн хүнийг ажилд зуучилсан зэрэг цогц үйлчилгээ үзүүлж, хэвийн амьдралд нь  туслахыг зорьдог” гэлээ. 

Сэтгэц нийгмийн сэргээн засах төвийг аймаг, дүүргийн эрүүл мэндийн төвийг түшиглэн байгуулахдаа мэргэшсэн хүний нөөцийг бэлтгэж, хууль тогтоомжид өөрчлөлт оруулж, тодорхой төсөв, санхүүжилтийг шийдэх аж.