БАЯН-ӨЛГИЙ: Наурызын гоо бүсгүйгээр С.Нуржан шалгарлаа

Наурызын баярыг тохиолдуулан үндэсний өв соёлоо хадгалан хамгаалах, ард түмний дундаас авьяас чадвартай, өөртөө итгэлтэй охид бүсгүйчүүдийг таниулах, үндэсний өв соёлыг хойч үедээ өвлүүлэн үлдээх, түгээн дэлгэрүүлэх зорилгоор “Наурыз аруы-2025” буюу гоо бүсгүй шалгаруулах уралдааныг зохион байгууллаа.

Баян-Өлгий аймгийн ЗДТГ, Соёл, урлаг, аялал жуулчлал, залуучуудын газар, Б.Ахтаны нэрэмжит аймгийн төв Номын сан, Хөгжимт драмын театр өв соёлыг сурталчилсан энэхүү уралдааныг хамтран зохион явууллаа.

Жил болгон Наурыз баяраар улалмжлал болгон зохион байгуулдаг уг уралдаанд казах үндэстний өв соёл, зан заншлыг дээдлэн хүндэлж Цэнгэл, Алтай, Бугат, Ногооннуур, Өлгий сум, болон Улаанхус сумын Согоог баг, Цагааннууур тосгоноос 19 охид бүсгүйчүүд энэхүү уралдаанд оюун ухаан, авьяас билгээрээ бусдыг манлайлан амжилттай оролцож, шилдэг оролцогчид шагналт байруудад шалгарлаа.

Үүнд, тэргүүн байрт /Гранпри/: “Зайд” сургуулийн сурагч, 16 настай Солтханы Нуржан, 1 дүгээр байрт Бугат сумаас оролцсон 24 настай Амангажын Нуршуах, 2 дугаар байрт МУБИС-ийн, Баян-Өлгий аймаг дахь салбар сургуулиас оролцсон 23 настай Сахайн Разгүл, 3 дугаар байрт Цэнгэл сумаас ирж оролцсон 17 настай Нурланы Айганым, тусгай байрт Цагааннуур тосгоноос оролцсон 17 настай Серикжаны Медине нар тус тус шалгарлаа.