Израилын нисэх онгоцнууд Ливаны өмнөд хэсгийг бөмбөгджээ

Хезболла зэвсэгт бүлэглэлийн ашигладаг харилцаа холбооны хэрэгслүүд хоёр өдөр дараалан дэлбэрсний дараа пүрэв гарагт Израил Ливаны өмнөд хэсгийг бөмбөгджээ.

Израилын зүгээс байлдааны онгоцнууд нь Ливаны өмнөд хэсэгт орших тосгонд шөнө цохилт өгсөн гэж мэдэгдсэн бол аюулгүй байдлын эх сурвалж болон Хезболлагийн аль-Манар телевизийн мэдээлснээр пүрэв гарагийн үдээс хойш хилийн ойролцоо агаарын цохилт дахин эхэлсэн байна.

Өнгөрсөн шөнийн агаарын цохилтод Ливаны өмнөд хэсэгт орших Чихине, Тайибе, Блида, Мейс Эль Жабал, Айтароун, Кфаркела дахь Хезболла бүлэглэлийн объектууд болон Хиам дахь Хезболлагийн зэвсгийн агуулах өртжээ.

Аравдугаар сарын 7-нд болсон Хамас бүлэглэлийн дайралтын дараа Хезболла Израилын эсрэг пуужингийн цохилт өгсөн бөгөөд түүнээс хойш талууд хил дамнан тасралтгүй гал нээсээр байгаа юм.

Пүрэв гарагт Израилын аюулгүй байдлын хүчин мөн Ираны захиалгаар Ерөнхий сайд Бенжамин Нетаньяху, Батлан ​​хамгаалахын сайд эсвэл Шин Бет тагнуулын агентлагийн тэргүүнийг хөнөөхөөр төлөвлөж байсан Израил гаралтай бизнесменийг өнгөрсөн сард баривчилснаа мэдэгджээ. Тухайн этгээдийг дор хаяж хоёр удаа хууль бусаар Ираны хилийг давж, тэнд Ираны аюулгүй байдлын ажилтантай уулзаж, төлөвлөгөөний талаар хэлэлцсэн гэж үзэж байгаа аж.

Эх сурвалж: Reuters