ЗАВХАН: Тусгай хамгаалалттай газрын тарваганы тоо толгой өсжээ

Отгонтэнгэр уул орчмын монгол тарвага жилд 298-аар өсжээ.

Отгонтэнгэрийн улсын тусгай хамгаалалттай газар дахь монгол тарваганы тоо толгой сүүлийн таван жилд дунджаар 297,79 буюу ойролцоогоор 298 бодгалиар өссөн үзүүлэлт ажиглагдаж байна. Монгол тарвагыг /Marmora sibirica/ хамгийн сүүлд 2023 онд цэгэн тооллогын аргазүйгээр гурван ажиглалтаар 389  бодгалийг тоолсон.

Тарвагатайн нурууны байгалийн цогцолборт газарт дөрвөн ажиглалтаар 512 бодгаль, Улаагчны хар нуурын байгалийн цогцолборт газарт нэг ажиглалтаар 78 бодгаль нийт  8 ажиглалтаар 979 бодгаль тэмдэглэгдсэн байна.

Отгонтэнгэрийн дархан цаазат газрын Отгонтэнгэр уулын өвөр хэсэг Чулуут, Мандалтаас Буянт голын эх хүртэл тарваганы гол нөөц байдаг. Мөн Халзан даваа, Таван салаа, Тарвагатайн нурууны байгалийн цогцолборт газрын Бургаст, Хашаат, Умгар, Заваг, Цагаан нүүр, Сэрвэнгийн бэл, Ямаат зэрэг газруудаар тархсан байна. Эдгээр газруудаар тарваганы тоо толгой цөөн боловч популяцийн хувьд харьцангуй тогтвортой байна.

Тарваганы мөндөл хотилны бүлд эзлэх хувь 36 хувь байгаа нь өсөлт үржил хэвийн сайн байгааг харуулж байна. Нөгөө талаас бие гүйцсэн бодгалийн тоо их байгаа нь хүний үзүүлэх нөлөө бага, хяналт шалгалтын ажил сайн байгаа гэж үзэж болох юм.

Тарваганы тархалтын амьдрах орчны сонголтоос харахад өвслөг ургамалтай, хайргархуу хөрс зонхилсон бүтэцтэй уулын дунд болон бэлийг сонгон амьдарч байна. Нийт тарваганы тархалт бүхий газраар хүний хүчин зүйл бага байна. Улсын тусгай хамгаалалттай болон дархан цаазтай газрын тарвагыг агнахыг хуулиар хориглодог.

Тусгай хамгаалалттай газар нутгийн тухай хуулийн 21-р зүйлд: “Байгалийн нөөц газарт түүний байгаль орчинд сөрөг нөлөө үзүүлж болзошгүй барилга байгууламж барих, үйлдвэрлэлийн зориулалтаар газар ухах, тэсэлгээ хийх, ашигт малтмал хайх, олборлох, ан амьтан агнах, барих, мод, зэгс, шагшуурга бэлтгэх зэргээр байгалийн унаган төрхийг өөрчлөх, мал аж ахуй эрхлэгч малчин өрхөд өвөлжөө, хаваржааны газар олгох, голын усыг бохирдуулах аливаа үйл ажиллагаа явуулахыг хориглоно” гэж заасан байдаг тухай Отгонтэнгэрийн улсын тусгай хамгаалалттай газрын хамгаалалтын захиргаанаас мэдээлэв. 

Отгонтэнгэрийн улсын тусгай хамгаалалттай газрын монгол тарваганы тархалт