Хойд Солонгосын хакерууд цэргийн нууцад халдаж байгааг АНУ болон түүний холбоотнууд анхаарууллаа

Хойд Солонгосын хакерууд дэлхийн улс орнуудын засгийн газар болон хувийн компаниудаас цөмийн болон цэргийн нууц хулгайлахаар оролдож байгааг АНУ, Их Британи, Өмнөд Солонгос улс пүрэв гарагт анхаарууллаа.

Тэдний үзэж буйгаар “Andariel” болон “Onyx Sleet” нэрээр хүмүүст танил болсон бүлэглэл нь Пхеньяны цэрэг, цөмийн хөтөлбөр, амбицыг урагшлуулах зорилгоор нууц мэдээлэл олж авахын тулд батлан ​​хамгаалах, сансар судлал, цөмийн болон инженерийн байгууллагуудыг онилдог байна.

Тус бүлэглэл ураны боловсруулалтаас эхлээд танк, шумбагч онгоц, торпедо болон робот машин, механик гар, 3D хэвлэх эд ангиуд зэрэг өргөн хүрээний мэдээлэл хайдаг бөгөөд Их Британи, АНУ, Өмнөд Солонгос, Япон, Энэтхэг болон бусад улсуудаас мэдээлэл хулгайлахаар оролджээ.

АНУ-ын хувьд нисэх хүчний баазууд, НАСА болон батлан ​​хамгаалахын компаниудыг онилсон гэв.

Түүнчлэн тус бүлэглэл АНУ-ын эрүүл мэндийн байгууллагуудын эсрэг “ransomware” халдлагаар дамжуулан тагнуулын үйл ажиллагаагаа санхүүжүүлдэг байна.

Их Британийн Үндэсний кибер аюулгүй байдлын төвийн (NCSC) үйл ажиллагаа хариуцсан захирал Пол Чичестерын хэлснээр тус байгууллага “Andariel”-ыг Хойд Солонгосын Тагнуулын Ерөнхий Товчооны (RGB) 3-р товчоонд харьяалагддаг гэж үзэж байгаа аж.

АНУ, Их Британи, Өмнөд Солонгос хамтарсан мэдэгдлийнхээ үеэр Хойд Солонгосын хакеруудаас хамгаалахад туслах зөвлөмжийг хуваалцсан байна.

АНУ болон түүний холбоотнууд Хойд Солонгосын хакеруудын талаар олон жилийн турш сэрэмжлүүлж ирсэн.

Тухайлбал, 10 гаруй жилийн турш үйл ажиллагаагаа явуулж байгаа тус улсын “Lazarus” бүлэглэл дэлхий даяар хувийн байгууллагууд, засгийн газруудыг онилж, олон сая доллар хулгайлаад байгаа билээ.

Эх сурвалж: BBC