31 эмэгтэйг хөнөөсөн Оросын “Волга маньяк” хочтой цуврал алуурчин шүүхээс бүх насаар хорих ял сонсжээ

Пүрэв гарагт Оросын Бүгд Найрамдах Татарстан Улсын Дээд шүүх 31 өндөр настай эмэгтэйн амийг хөнөөсөн “Волга маньяк” хочтой цуврал алуурчин Радик Тагировт бүх насаар хорих ял оноожээ. 

Тагиров нь 2011-2012 оны хооронд Москвагаас зүүн тийш 730 километрийн зайд орших Татарстаны бүс нутаг болон түүний эргэн тойронд орших 15 хотод гэмт хэргээ үйлдсэн бөгөөд 2020 онд баривчлагдсан юм.

Хууль сахиулах байгууллагын мэдээлснээр тэрээр нийгмийн ажилтан, цахилгаанчин, сантехникчийн дүрээр хохирогч эмэгтэйчүүдийн гэрт ороод, тэднийг боомилж, үнэт зүйлийг нь хулгайлдаг байжээ. 

Шүүх мөн Тагировыг хэд хэдэн аллага үйлдэхийг завдсан, мөн өөр 34 эмэгтэйн биед халдсан хэрэгт буруутай гэж үзсэн байна. Тэрээр өмнө нь жижиг хулгайн хэргээр шоронд хоригдож байсан нэгэн аж.

Мөрдөн байцаалтын явцад хэргээ хүлээсэн ч Тагиров шүүх хурлын үеэр өөрт нь тулгасан бүх хэргийг үгүйсгэсэн байна.

“Тасс” агентлагийн мэдээлснээр түүний өмгөөлөгч Марат Аширов шүүхийн шийдвэрийг давж заалдахаа мэдэгджээ.

Эх сурвалж: The Moscow Times