БАЯН-ӨЛГИЙ: Наурыз баярыг угтан их цэвэрлэгээ хийж байна

Наурызын баярыг угтан Өлгий сумын ЗДТГ-аас аймгийн төвд үйл ажиллагаа явуулдаг бүх албан байгууллагатай хамтран гудамж талбайд их цэвэрлэгээ хийх ажлыг өчигдрөөс эхлүүллээ. 

Хуулийн дагуу албан байгууллагууд эргэн тойрныхоо 50 метр хүртэлх зам талбайг цэвэрлэж байх үүрэг хүлээдэг. Түүнээс гадна аймгийн төв Өлгий хот руу орж, гарах 6 чиглэлийн зам дагуу тодорхой газрын цэвэрлэгээ хийх хуваарь гаргаж байгууллагуудад хүргүүлсэн байна.  

"Аймгийн төвийн зам талбайг Хот тохижуулах алба цэвэрлэж байгаа. Ер нь цэвэрлэгээний ажил өмнөх жилүүдтэй харьцуулахад сайжирсан. Харин айл өрхүүдийн дунд хашааныхаа гадна үнс, хог хаягдлыг ил задгай асгах асуудал байгаа. Мөн үхсэн малын сэг зэмийг үерээс хамгаалах далан дотор маш ихээр хаяж байна. Тийм учраас айл өрхүүдэд ч байгаль орчны хяналтын байцаагчаар дамжуулан албан шаардлага хүргүүлж байгаа. Цэвэрлэгээ хийх, ариун цэврийг сахих асуудлыг зөвхөн баяр наадмын үед хөндөх биш, тогтмол хийж дадал болгохыг уриалж байна" хэмээн Өлгий сумын Засаг дарга Х.Нурболат хэлэв.