Малайз Улсын Авлигын эсрэг хороотой хамтран ажиллах санамж бичиг байгуулна

Авлигатай тэмцэх газрын дарга, тэргүүн комиссар З.Дашдаваа Малайз Улсын Авлигын эсрэг хорооны дарга, тэргүүн комиссар Тан Шри Дато Шри Хажи Азам бин Бакигийн урилгаар тус хороонд албан айлчлал хийж байна.

Айлчлалын эхний өдөр Авлигатай тэмцэх газрын төлөөлөгч нар Путражаяа хотод байрлах Хорооны төв байранд ажиллаж, хорооны бүтэц, зохион байгуулалт, үйл ажиллагаа болон авлигын гэмт хэрэг илрүүлэх, мөрдөн шалгах, авлигаас урьдчилан сэргийлэх, Авлигатай тэмцэх үндэсний хөтөлбөр, түүнийг хэрэгжүүлэх ажлын төлөвлөгөөний гүйцэтгэл зэрэг асуудлаар харилцан илтгэл хэлэлцүүлж, туршлага солилцов.

Малайз Улсын Авлигын эсрэг хороо нь 1967 онд байгуулагдсан дэлхийн хамгийн анхны авлигатай тэмцэх чиглэлийн тусгайлсан байгууллагуудын нэг бөгөөд өнөөдөр 2800 гаруй албан хаагчтай үйл ажиллагаа явуулж байна. Тус хороо нь БНХАУ-ын засаг захиргааны онцгой бүс Хонгконгийн Авлигын эсрэг бие даасан хорооны загвараар буюу авлигын гэмт хэрэг мөрдөн шалгах, урьдчилан сэргийлэх, олон нийттэй харилцах гэсэн үндсэн гурван тулгуурт зарчим, чиг үүргийг хэрэгжүүлдэг. 1200 мөрдөгч ажиллаж, жилд дунджаар 500 орчим эрүүгийн хэрэг, 300 гаруй хэрэг бүртгэлтийн хэрэгт мөрдөн шалгах ажиллагаа явуулдаг байна.

Тус өдөр Малайз Улсын Авлигын эсрэг хорооны дарга, тэргүүн комиссар, ноён Тан Шри Дато Шри Хажи Азам бин Бакитай хоёр талт уулзалт хийж, хамтын ажиллагааг өргөжүүлэх чиглэлээр харилцан санал солилцож, энэ оны эхний хагаст багтаан Харилцан ойлголцлын санамж бичиг байгуулахаар үндсэн чиглэлүүдээ тохиролцлоо. Ноён Азам бин Баки “Хэдий богино хугацаанд үйл ажиллагаа явуулж буй ч гадаад хамтын ажиллагааг өргөжүүлэх болон авлигын гэмт хэргийг илрүүлэн мөрдөн шалгаж, шүүхээр шийдвэрлүүлсэн хэргийн тоо тогтмол өсч амжилттай ажиллаж буй Монгол Улсын Авлигатай тэмцэх газрын үйл ажиллагааг өндрөөр үнэлдэг” хэмээгээд авлигатай тэмцэхэд ижил чиг үүрэгтэй байгууллага хоорондын нягт, тууштай хамтын ажиллагаа чухал болохыг тэмдэглэв.

Айлчлалын хүрээнд Малайз Улсын Авлигын эсрэг хорооны дэргэдэх Авлигын эсрэг академид зочлон, үйл ажиллагаатай нь танилцаж, академийн Хүндэт дэвтэрт Авлигатай тэмцэх газрын дарга, тэргүүн комиссар З.Дашдаваа гарын үсэг зурав. Цаашид Монгол Улсын Авлигатай тэмцэх газрын албан хаагчдыг тус академиас зохион байгуулдаг тусгайлсан сургалтуудад үе шаттай сургахаар ярилцаж тогтов.