"Ойрын хугацаанд 730 вагон орж ирэхээс өнөөдөр 117 вагон түлш оруулахаар тохирсон"

Монгол Оросын хамтарсан ЗГ-ын гишүүд мэдээлэл хийлээ.

ОХУ-аас шатахуун, түлшний нийлүүлэлт хэвийн явагдаж байгаа бөгөөд өнөөдөр 117 вагон, ойрын 4 хоногт нийт 350 вагон түлш хилээр нэвтрэх хуваарьтай байна.  Өнөөдөр УИХ-ын дарга Г.Занданшатар Монгол, Оросын Засгийн газар хоорондын комиссын Оросын хэсгийн дарга, ОХУ-ын Экологи, Байгалийн нөөцийн сайд А.А.Козловыг хүлээн авч уулзлаа. Уулзалтын эхэнд цаг үеийн шинжтэйгээр түлш, шатахууны нийлүүлэлт, тээвэрлэлтийн нөхцөл байдалтай холбоотой мэдээллийг УИХ-ын даргад өгөхдөө дээрх хуваарийг танилцуулав. УИХ-ын даргын зүгээс уг асуудалд анхаарч, ОХУ-ын Холбооны хуралтай удаа дараа холбогдсон тул яаралтай арга хэмжээ авч, мэдээллүүдийг нэгтгэн авсан гэдгээ ОХУ-ын Экологи, Байгалийн нөөцийн сайд А.А.Козлов тодотгов. 
Уг мэдээлэлд дурдсанаар Роснефть компанийн зүгээс нөөц хангалттай, нийлүүлэлт тасралтгүй бөгөөд хэвийн хийгдэж байгаа ч төмөр замын тээвэр зохион байгуулалттай холбоотой зарим бэрхшээл үүссэнийг шийдвэрлэсэн байна. Ингэснээр 11-р сарын 29 буюу өнөөдөр 117 вагон түлш хилээр нийлүүлэх бөгөөд 12-р сарын 2 хүртэл нийт 350 вагон, цаашлаад ойрын хугацаанд нийт 730 вагон түлш нийлүүлэх хуваарийг Оросын Төмөр замууд нээлттэй хувьцаат нийгэмлэгээс албан ёсоор ирүүлсэн гэв. Мөн нийлүүлж буй шатахуун, түлш хилээр нэвтэрснээс хойших буюу Монголын талын тээвэр зохион байгуулалтын асуудалд зарим бэрхшээл тулгарч буй тул анхаарал хандуулахыг УИХ-ын даргаас хүсэв. Энэ хүрээнд Монгол улсад нийлүүлэх шатахуун, түлшний тээвэрлэлттэй холбоотой асуудлыг Оросын Төмөр замууд нээлттэй хувьцаат нийгэмлэгийн орлогч дарга Оросын талаас бүрэн хариуцан ажиллахаар болсныг дуулгаад, Монголын талын хариуцан ажиллах албан тушаалтныг тухайлан томилж өгөхийг УИХ-ын дарга Г.Занданшатараас хүслээ.