БАЙГАЛЬ ОРЧИН

Нэг сая тонн цацраг идэвхт усыг далай руу юүлэхийг БНСУ, Хятад эсэргүүцэж байна

Одоогоос 10 жилийн өмнө болсон цунамийн улмаас осол гарсан “Фүкүшима-1” АЦС-д хадгалагдаж буй нэг сая тонн усыг далай руу юүлэхийг Японы эрх баригчид зөвшөөрөөд байгаа. Усыг цацраг идэвхт бодисоос цэвэрлэх учир далай руу асгасан ч аюулгүй гэж Токио мэдэгдэж буй. Гэхдээ хөрш улс орнууд, тухайлбал, БНСУ, БНХАУ эсэргүүцэж, болгоомжилж буйгаа илэрхийлжээ.

“Ройтерс” агентлагийн мэдээлж буйгаар, “Фүкүшима” АЦС-ын асар том усан санд 1.3 сая тонн буюу олимпын усанд сэлэлтийн 500 санг дүүргэх хэмжээний ус хадгалагдаж байгаа бөгөөд хорт бодисыг нь хоёр жилийн хугацаанд цэвэрлэж, аюулгүй болгосны дараа далай руу асгах аж. Гэхдээ устөрөгчийн цацраг идэвхт изотоп болох тритийг уснаас бүрэн цэвэрлэх боломж техникийн хувьд одоогоор алга. Гэвч усыг далай руу юүлэх үед тритийн агууламж нь ундны усанд байхыг зөвшөөрсөн хэмжээнд (ДЭМБ-аас тогтоосон) буюу эрүүл мэндэд нөлөөлөхөөргүй болгоно гэж Токио мэдэгдсэн.

Усыг ийнхүү юүлснээр далайн эко систем болон ард иргэдийнх нь эрүүл мэндэд хор хөнөөл учруулж магадгүй талаар зовниж буйгаа БНСУ-ын төлөөлөгчид  илэрхийлэв. Түүнчлэн хөрш улс орнууд болон Олон улсын цөмийн эрчим хүчний агентлаг энэ шийдвэрийг хүлээн зөвшөөрөхөөс нааш усыг далай руу юүлэх ёсгүй гэж БНХАУ үзэж байгаа юм.

Харин Японы Ерөнхий сайд Ёшихидэ Суга байгаль орчин, хүн ардын эрүүл мэндэд хор хөнөөл учруулахгүйн тулд шаардлагатай бүх арга хэмжээг авахаа мэдэгдсэн байна.

Эх сурвалж: ВВС

Хариулах


ШИНЭ МЭДЭЭ



Ангилал өөрчлөх бол дахин бүртгүүлнэ үү.

Дээш
Tweet